शिंदवणे घाटात चालकाच्या प्रसंगावधानामुळे वाचले २२ प्रवाशांचे प्राण

उरुळी कांचन : सासवडहून उरुळी कांचन या मार्गी निघालेल्या पीएमपीएल बसचा शिंदवणे घाटातच ब्रेक फेल झाला. ही बाब लक्षात येताच बस चालकाने दाखवलेल्या प्रसंगावधानाने या ठिकाणी होणारी मोठी दुर्घटना टळली. किशोर कदम असे या पीएमपीएल बस चालकाचे नाव आहे. यावेळी या बस मध्ये एकूण २२ प्रवासी प्रवास करत होते. या प्रवास करणाऱ्या प्रवाशांना कोणतीही दुखापत झाली नाही.

मिळालेल्या माहितीनुसार, साधारणपणे सकाळी सात वाजता सासवडहून उरुळी कांचन या मार्गी पीएमपीएल बस ही २२ प्रवाशांना घेऊन निघाली असता शिंदवणे घाटातील मंदिराजवळ तीव्र उतारावर ब्रेक फेल झाल्याचे बस चालक किशोर कदम यांच्या लक्षात आले. घाटात एका बाजूने डोंगर तर दुसऱ्या बाजूला दरी असल्याने कदम यांनी प्रसंगावधान दाखवून डोंगराच्या बाजुला बस धडकून थांबविल्याने प्रवाशांनी सुटकेचा निःश्वास टाकला. आणि प्रवाशांनी चालकाचे आभार मानले.

दरम्यान, उरुळी कांचन ते सासवड या मार्गी बससेवा सुरू करण्यासाठी प्रवाशांकडून सातत्याने मागणी होत होती. या मागणीचा पीएमपीएलचे वाहतूक व्यवस्थापक दत्तात्रय झेंडे, माजी सनदी अधिकारी संभाजीराव शिंदे यांनी पाठपुरावा केल्याने सासवड शिंदवणे घाट मार्गे उरुळी कांचन अशी बससेवा सुरू करण्यात आली आहे.