पुणे जिल्ह्यात बुधवारी दिवसभरात ५ हजार ८५० नवीन कोरोना रुग्ण; १२ जणांचा मृत्यू

पुणे - पुणे जिल्ह्यातील (Pune District) एकूण सक्रिय कोरोना रुग्णांची (Corona Patients) संख्या मागील दहा दिवसांपासून सातत्याने झपाट्याने कमी होऊ लागली आहे. दहा दिवसांपूर्वी ९३ हजार ६४२ वर पोचलेली ही संख्या बुधवारी (ता.२) पन्नास हजारांच्या आत आली आहे. पुणे जिल्ह्यात सध्या एकूण ४६ हजार ७१० सक्रिय कोरोना रुग्ण शिल्लक राहिले आहेत. गेल्या दोन दिवसांत तब्बल साडेबारा हजार सक्रिय रुग्ण कमी झाले आहेत. जिल्हा आरोग्य विभागाच्यावतीने प्रसिद्ध करण्यात आलेल्या कोरोना आकडेवारी अहवालातून हे स्पष्ट झाले आहे.

जिल्ह्यात बुधवारी दिवसभरात ५ हजार ८५० नवीन कोरोना रुग्ण आढळून आले असून, ११ हजार ३९३ जणांनी कोरोनावर मात केली आहे. अन्य १२ जणांचा कोरोनाने मृत्यू झाला आहे. दिवसातील एकूण मृत्यूमध्ये पुणे शहरातील सात, पिंपरी चिंचवडमधील तीन आणि जिल्हा परिषद कार्यक्षेत्रातील दोन मृत्यू आहेत. बुधवारी दिवसभरात नगरपालिका आणि कॅंटोन्मेंट बोर्ड हद्दीत एकही मृत्यू झाला नाही.

जिल्ह्यातील दिवसातील एकूण नवीन रुग्णांमध्ये पुणे शहरातील सर्वाधिक २ हजार ८४६ रुग्ण आहेत. दिवसात पिंपरी चिंचवडमध्ये १ हजार ६९६, जिल्हा परिषद कार्यक्षेत्रात १ हजार ३४, नगरपालिका हद्दीत २१० आणि कॅंटोन्मेंट बोर्ड क्षेत्रात ६४ नवे रुग्ण आढळून आले आहेत. एकूण कोरोनामुक्तांमध्येही पुणे शहरातील सर्वाधिक ५ हजार५२१ जण आहेत. पिंपरी चिंचवडमधील ३ हजार ४९२, जिल्हा परिषद कार्यक्षेत्रातील १ हजार ८३१, नगरपालिका हद्दीतील ३७५ आणि कॅंटोन्मेंट बोर्ड क्षेत्रातील १७४ जण दिवसभरात कोरोनामुक्त झाले आहेत.