प्रवासवर्णने लिहिणारी व्यक्ती मनाने अनेक प्रवास करते

पुणे, ता. १५ : ‘‘जी व्यक्ती प्रवासवर्णने लिहिते, ती मनाने अनेक प्रवास करते’’, असे मत कवयित्री मनीषा दीक्षित यांनी नुकतेच व्यक्त केले.
स्वाती कर्वे लिखित आणि प्रफुल्लता प्रकाशनातर्फे प्रकाशित ‘ओमान... मस्कत’ या पुस्तकाच्या प्रकाशन सोहळ्यात त्या बोलत होत्या. याप्रसंगी लेखिका-संपादिका डॉ. वंदना बोकील-कुलकर्णी, कल्याणी गाडगीळ, लेखिका स्वाती कर्वे आदी उपस्थित होत्या.
डॉ. वंदना बोकील-कुलकर्णी म्हणाल्या, ‘‘प्रवासवर्णन म्हणण्यापेक्षा या पुस्तकाला प्रवासावर आधारित ललित गद्य म्हणावे लागेल. या लेखनातून लेखिकेचा जिद्दी, धाडसी स्वभाव, स्त्रियांचे प्रश्‍न जाणून घेण्याची वृत्ती, माणसांना भेटणे, शोध घेणे या गोष्टी दिसतात.’’
गाडगीळ म्हणाल्या, ‘‘ओमान हा भारताच्या इतका जवळ असलेला देश आहे, पण त्याच्याबद्दल कुणाला फारसे माहीत नाही. त्या दृष्टीने या पुस्तकाचे महत्त्व आहे. ते सगळ्यांनी आवर्जून वाचायला हवे.’’ 
अश्‍विनी काशीकर यांनी शारदास्तवन सादर केले. ओमान येथे सध्या स्थायिक झालेल्या सुभाष देसाई यांनी मनोगत व्यक्त केले. लेखक, संपादक महेंद्र कानिटकर यांनी सूत्रसंचालन केले. या कार्यक्रमाला लेखिका मंगला गोडबोले, माध्यमतज्ज्ञ केशव साठे, गायिका शोभा जोशी, प्रा. प्रकाश भोंडे, माईंड ट्रेनर रविबाला काकतकर आदी उपस्थित होते.