वर्षभर फरारी असलेल्या गुन्हेगारास पिस्तुलासह अटक

पुणे : पिस्तुल बाळगल्याच्या गुन्ह्यात एक वर्षापासून फरारी असलेल्या सराईत गुन्हेगारास गुन्हे शाखेच्या युनीट एकच्या पथकाने धनकवडी परिसरातुन अटक केली. पोलिसांनी त्याच्याकडून पिस्तुल व जिवंत काडतुस जप्त केले.

महेश उर्फ मिट्या राजेंद्र नवले (वय 23, रा. पर्वती दर्शन) असे अटक केलेल्या सराईत गुन्हेगाराचे नाव आहे. पोलिसांनी दिलेल्या माहितीनुसार, गुन्हे शाखेच्या युनीट एकचे पोलिस कर्मचारी 16 ऑगस्ट 2020 रोजी शहरात गस्त घालत होते. त्यावेळी सुरज अडागळे हा सराईत गुन्हेगार पिस्तुल घेऊन संशयीतरित्या फिरत असल्याची माहिती पोलिसांना मिळाली. त्यावेळी पोलिसांनी त्याच्याकडून एक गावठी पिस्तुल, एक जिवंत काडतुस मॅगझीनसह जप्त केले होते.

त्यास पिस्तुल व काडतुस महेश नवले याने दिल्याची माहिती त्याने पोलिसांना दिली. याप्रकरणी दाखल गुन्ह्यात नवले हा एक वर्षापासून फरारी होता. दरम्यान पोलिस कर्मचारी अजय थोरात, अमोल पवार व इम्रान शेख हे गस्त घालीत असताना त्यांना नवले हा धनवकवडी येथील यशवंतनगर परिसरात येणार असल्याची खबर मिळाली.

त्यानुसार, पोलिस उपनिरीक्षक संजय गायकवाड, थोरात, पवार, शेख, राहुल मखरे, अय्याज दड्डीकर, तुषार माळवदकर यांच्या पथकाने त्यास ताब्यात घेऊन त्याच्याकडे चौकशी केली, तेव्हा त्यानेच अडागळेला पिस्तुल दिल्याची कबुली दिली. तसेच त्याच्याकडे आणखी चौकशी केल्यानंतर पोलिसांनी त्याच्या घरातुन एक पिस्तुल व एक जिवंत काडतुस जप्त केले.