Accident News : पोलिस कर्मचारी संदीप कदम यांचा अपघातात मृत्यू...

बारामती - पुणे ग्रामीण पोलिस दलाअंतर्गत पाटस पोलिस चौकीत कार्यरत असलेले मूळचे बारामतीकर संदीप जगन्नाथ कदम यांचे आज निधन झाले. शुक्रवारी (ता. 22) फिरायला निघालेले असताना पाठीमागून आलेल्या तीन चाकी टेंपोने त्यांना जोरदार धडक दिली. यात ते गंभीर जखमी झाले होते. त्यांच्यावर पुण्यातील खाजगी रुग्णालयात उपचार सुरु होते, मात्र आज त्यांचे निधन झाले.

संदीप कदम यांनी बारामती शहर तसेच जिल्हा गुन्हे अन्वेषण शाखा, लोणी काळभोर पोलिस ठाण्यात काम केलेले आहे. सध्या ते पाटस पोलिस चौकीत कार्यरत होते. अनेक गुन्ह्यांच्या उकलीमध्ये त्यांचा सिंहाचा वाटा होता. अतिशय धाडसी पोलिस कर्मचारी म्हणून त्यांची पोलिस दलात ओळख होती.

या घटनेचा व्हिडीओ समोर आला असून त्या मध्ये संदीप कदम हे रस्त्याच्या कडेने जाताना मागून आलेल्या टेंपोने त्यांना जोरदार धडक दिल्याचे दिसत आहे. हा अपघात होता की घातपात आहे, या बाबत पोलिसांनी सखोल तपास करावा अशी मागणी होत आहे. संदीप कदम यांनी अनेक गुन्ह्यांची उकल करत अनेक गुन्हेगारांना गजाआड केलेले होते, गुन्हे शोध पथकात काम करताना त्यांची कामगिरी चमकदार होती, या पार्श्वभूमीवर हा अपघात की घातपात याची चर्चा बारामती सुरु आहे.