पुणेकरांनो, कोंढव्यातील मिठानगर रस्त्याने जाताय? वाहने सावकाश चालवा कारण....

कोंढवा (पुणे) : रस्त्यावरील दुभाजक हे नागरिकांच्या सुरक्षिततेसाठी असतात, पण कोंढव्यातील मिठानगरातील परिस्थिती नेमकी उलटी आहे. याठिकाणी रस्त्यावरील दुभाजक नेमके कधी सुरू होतात, याचा कसलाही अंदाज वाहनचालकांना येत नसल्याने दुभाजकावर वाहने चढून अपघात होण्याचे प्रमाण वाढले आहे. ठिकठिकाणी तुटलेले दुभाजक, दुभाजकावर रंग नसणे, उंचीबाबत असमानता, दुभाजक सुरू होण्यापूर्वी आवश्‍यक असणारे पट्टे, तसेच रिफ्लेक्‍टर नसणे, असे प्रकार मिठानगर रस्त्यावर असल्याचे "सकाळ'च्या वतीने  केलेल्या पाहणीत आढळून आले. 

- पुण्यातील 'जम्बो हॉस्पिटल'चा मुख्यमंत्र्यांच्या हस्ते होणार 'श्रीगणेशा'!​

दुभाजकाबाबत महापालिका आणि वाहतूक पोलिस यांच्यात कोणताही समन्वय, तसेच धोरणच नसल्याची बाबही समोर आली आहे. रहिवासी अबीर सिद्घीकी म्हणाले, "मिठानगर येथील दुभाजकावर गंभीर अपघात होऊनही महापालिका प्रशासन उपाययोजना करत नाही. दुभाजकाची उंची वाढवावी व त्यावर रिफ्लेक्‍टर बसवावे याबाबत महापालिकेकडे अनेकदा मागणी केली. मात्र, प्रशासनाकडून आवश्‍यक त्या उपाययोजना केल्या जात नाही. अपघात घडल्यास हळहळ व्यक्त करण्याशिवाय काहीही केले जात नाही. आता तरी लोकांचे बळी जाऊ नयेत, यासाठी उपाययोजना कराव्यात.' 

- पुण्याच्या बातम्या वाचण्यासाठी येथे ► क्लिक करा

दुभाजकांची चुकीची बांधणी, अपुरी देखभाल, अपघातांमुळे झालेली दुरवस्था यामुळे कोंढव्यातील अनेक ठिकाणचे दुभाजक धोकादायक बनले असून दुभाजकावर वाहने जात असल्याने या भागात दररोज अपघाताची मालिका सुरू आहे. दुभाजक बांधताना ते निकषानुसार व पुरेशा उंचीवर बांधलेले नाहीत. अनेक ठिकाणी दुभाजकांचे निकष मोडून चुकीच्या पद्धतीने दुभाजक बांधण्यात आले आहेत. त्यामुळे भागात अपघातांची संख्या वाढली आहे. 
-संजय बधे, स्थानिक नागरिक. 

सध्या पावसाळा सुरू आहे. त्यामुळे या भागातील दुभाजकांवर चिखल साठला असल्याने रात्रीच्या अंधारात दुभाजक दिसत नाहीत. त्यामुळे वाहनांच्या अपघाताचे प्रमाण वाढले आहे. भविष्यात जीवितहानी होण्यासारख्या गंभीर अपघात होत असतात. एकूणच भविष्यात जीवितहानी होण्यासारख्या गंभीर अपघात होण्यापूर्वी दुभाजकाला धोक्‍याचा इशारा देणारे रिफ्लेक्‍टर बसवावेत. 
-संतोष जगताप, स्थानिक नागरिक. 
 

असे आहेत दुभाजक 

• दुभाजकाची उंची अनेक ठिकाणी असमान 
• दुभाजकांची उंची कमी असल्याने व त्यावरील रंग उडाल्याने दुभाजकाचा अंदाज येत नाही. 
• दुभाजकासाठी वापरलेले रंग निकृष्ट दर्जाचे 
• अनेक ठिकाणी रंगाचे पट्टे, रिफ्लेक्‍टर नाहीत.