पुण्यात मास्क न लावता फिरताय का? मग ही बातमी नक्की वाचा 

कोथरूड : कोरोना टाळण्यासाठी मास्क वापरणे आवश्यक असताना अनेक लोक मास्क न वापरता, बेफीकीरपणे रस्त्यावर फीरत असतात. त्यामुळे ते स्वतःसोबत इतरांचेही आरोग्य धोक्यात आणत आहेत. अशा लोकांना शिस्त लावण्यासाठी कोथरूडमधील महापालिकेच्या आरोग्य कर्मचा-यांनी जनजागृती मोहीम सुरू केली. मास्क लावणार की दंड भरणार? असे विचारत सुरू झालेल्या या मोहिमेत अवघ्या एका तासात अकरा हजार रूपये शुल्क वसूल करण्यात आले. 

ताज्या बातम्यांसाठी डाऊनलोड करा ई-सकाळचे ऍप

पुणे महानगरपालिकेच्या कार्यक्षेत्रात कोरोनाचा वाढता प्रादुर्भाव रोखण्यासाठी महाराष्ट्र शासनाने सार्वजनिक ठिकाणी थुंकून अस्वच्छता करणाऱ्या व मास्क न वापरणाऱ्या नागरिकांवर दंडात्मक कारवाईचा बडगा उगारला आहे.

सदर कारवाईचे आदेश विभागीय आयुक्तामार्फत देण्यात आले आहेत. महानगरपालिकेचे आरोग्य अधिकारी व पोलिस यंत्रणेला कारवाई करण्याचे अधिकार दिले आहेत. त्यानुसार कोथरूड, बावधन क्षेत्रिय कार्यालयाच्या अंतर्गत प्रभाग क्रमांक १२ डहाणूकर काॅलनी हजेरी कोठी अंतर्गत आरोग्य विभाग व लक्ष्मीनगर पोलिस चौकीतील पोलिस कर्मचारी यांच्या वतीने डहाणूकर काॅलनी भुयारी मार्ग कै. मोहनराव शिराळकर चौकात मास्क न वापरणाऱ्या नागरिकांवर तसेच सार्वजनिक ठिकाणी पान तंबाखू व गुटखा खाऊन थूंकणारे थुंकी बहाद्दरांवर संयुक्तरित्या दंडात्मक कारवाई करण्यात आली.  

देशभरातील इतर बातम्या वाचण्यासाठी येथे क्लिक करा

मास्क न वापरणाऱ्या प्रत्येक नागरिकांकडून पाचशे रुपये व थुंकी सम्राटाकडून एक हजार रुपये प्रमाणे दंड घेवून कारवाई करण्यात आली. मास्क न वापरणारे अठरा व सार्वजनिक ठिकाणी थुंकून कोरोनाला आमंत्रण देणाऱ्या तीन अशा एकूण एकवीस नागरिकांवर कारवाई  करण्यात आली.

जगभरातील इतर बातम्या वाचण्यासाठी येथे क्लिक करा

खिशात पैसे नसणाऱ्या कांही थुंकी सम्राटाना बैठका काढण्याच्या शिक्षाही देण्यात आल्या. सदर कारवाई कोथरूड बावधन क्षेत्रिय कार्यालयाचे महापालिका सहाय्यक आयुक्त संदीप कदम, वरिष्ठ आरोग्य निरिक्षक  राम सोनवणे, आरोग्य निरिक्षक सचिन लोहकरे,  पोलीस हवालदार गणेश भुजबळ, पोलीस कॉन्स्टेबल गौस मुलाणी, प्रशांत शिंदे, नेताजी गवळी, मोकादम वैजीनाथ गायकवाड, आण्णा ढावरे यांनी  केली.

(Edited by : Sagar Diliprao Shelar)