Pune News : प्रशासकीय गतिमानता अभियानाची पुणे विभागात आजपासून स्पर्धा

पुणे - पुणे विभागाच्या प्रशासनातील सेवांच्या गुणवत्तेमध्ये वाढ, लोकाभिमुखता आणण्यासाठी राबविण्यात येत असलेल्या राजीव गांधी प्रशासकीय गतिमानता (प्रगती) अभियानाची यंदाची स्पर्धा येत्या रविवारपासून (ता.२०) आयोजित करण्यात आली आहे. या स्पर्धेत पुणे विभागातील सर्व सरकारी कार्यालयांनी सहभागी व्हावे, असे आवाहन पुण्याचे विभागीय आयुक्त सौरभ राव यांनी केले आहे.

माजी पंतप्रधान राजीव गांधी यांच्या जयंतीपासून दरवर्षी ही स्पर्धा सुरु होत असते. यानुसार येत्या रविवारी (ता.२०) राजीव गांधी यांची जयंती आहे. यानुसार येत्या रविवारी सुरु होणारी प्रशासकीय गतिमानता (प्रगती) अभियानाच्या स्पर्धेचा कृती हा कालावधी हा महात्मा गांधी यांच्या जयंतीदिनापर्यंत (ता.२ आक्टोबर) असणार आहे. मात्र सन २०२३-२४ या वर्षाच्या स्पर्धेसाठी २० ऑगस्ट २०२२ ते १० ऑगस्ट २०२३ हा कालावधी ग्राह्य धरण्यात येणार आहे.

या स्पर्धेत कार्यालयीन व्यवस्थापनामध्ये आधुनिक संकल्पना व व्यवस्थापन पद्धतीचा अवलंब, सेवांची गुणवत्ता वाढ व उपक्रमांची परिणामकारकता, लोकाभिमुखता, ई-गव्हर्नन्स , संसाधनांचा पर्याप्त व प्रभावी वापर, तंटा, तक्रार मुक्त कार्यालय आणि नावीन्यपूर्ण व पथदर्शी स्वरूपाच्या संकल्पना आदी बाबींचा पारितोषिक निवडीसाठी विचार केला जाणार असल्याचे राव यांनी सांगितले.

दरम्यान, विभागात या अभियानाची प्रभावी अंमलबजावणी करण्यासाठी सर्व जिल्हाधिकाऱ्यांनी पालकमंत्र्यांच्या अध्यक्षतेखाली जिल्हास्तरावर तर, तालुक्याच्या ठिकाणी प्रांताधिकारी व तहसीलदारांनी आपापल्या तालुक्यातील सर्व ग्रामपंचायतीचे सरपंच, ग्रामसेवक, तलाठी व गटविकास अधिकारी यांची बैठक घेण्याचा आदेश राव यांनी सर्व जिल्हाधिकाऱ्यांना दिला आहे.