बिबवेवाडीत तुपामध्ये भेसळीचा प्रकार उघड

पुणे- ऐन दिवाळीच्या तोंडावर तुपामध्ये भेसळ करण्यात येणाऱ्या गोडाऊनवर छापा घालून भारती विद्यापीठ पोलिसांनी तब्बल 412 किलो भेसळयुक्त तूपसाठा जप्त केला. बिबवेवाडीतील एका इमारतीमध्ये असलेल्या दुकानात हा प्रकार सुरू होता. याप्रकरणी पोलिसांनी एकास ताब्यात घेतले असून, केशरसिंग मानसिंग राठोड (वय 40, रा. अप्पर इंदिरानगर) असे त्याचे नाव आहे.

भारती विद्यापीठ पोलिसांना बुधवारी रात्री दुचाकीवरील एक व्यक्ती कात्रज चौकात भेसळयुक्त तूप घेऊन येणार असल्याची माहिती मिळाली होती. त्यानुसार सापळा रचून राठोड यास ताब्यात घेतले. त्याच्याकडील तुपात तेल व डालडा टाकून भेसळ केल्याचे उघड झाल्यानंतर पोलिसांनी अन्न व औषध प्रशासन विभागाशी संपर्क साधून त्यांच्या सहकार्याने भेसळ होत असलेल्या बिबवेवाडी-कोंढवा रस्त्यावरील नोबेल एक्‍सलन्सी या इमारतीतील गोडाऊनवर छापा घातला. यात भेसळ केलेले गाईच्या तुपाचे 25 डबे जप्त केले.

या तुपाचे नमुने तपासण्यासाठी प्रयोगशाळेकडे पाठविले असून, पोलीस निरीक्षक विष्णू पवार, गुन्हे पोलिस निरीक्षक विष्णू ताम्हणे यांच्या मार्गदर्शनाखाली सहायक पोलीस निरीक्षक श्रीशैल चिवडशेट्टी, उमसे व तपास पथकातील चंद्रकांत फडतरे, कृष्णा बढे, सर्फराज देशमुख, सचिन पवार, गणेश चिंचकर, महेश मंडलिक, राहुल तांबे, कुंदन शिंदे, अभिजित रत्नपारखी यांच्या पथकाने ही कारवाई केली.