जाहिरातींत छोट्या पुणेकरांचे पाऊल पुढे...

पुणे - लहान मुलांच्या साबणाच्या जाहिरातीत दुडूदुडू धावणारे गोंडस बाळ... फास्ट फूडच्या जाहिरातीमध्ये माधुरी दीक्षितबरोबर डान्स करणारा चुणचुणीत मुलगा... अशा अनेक जाहिरातींमध्ये आपल्याला लहान मुले दिसतात. यातील अनेक मुले ही पुण्यातील आहेत. त्यामुळे अनेक ठिकाणी झळकण्यात ‘छोटे पुणेकर’ही पुढे आहेत. 

टेलिव्हिजनवरील विविध जाहिराती, कॅलेंडर, पोस्टर्स किंवा अगदी ग्रिटिंग्सवरील गोंडस बाळ आपण अनेक ठिकाणी पाहतो. यातील बहुतांशी मुले पुण्यातील असून, त्यांच्या सहभागाचे प्रमाणही वाढत आहे. अगदी दहा दिवसांच्या मुलापासून १५ वर्षांपर्यंतच्या मुलांचा विविध जाहिरातींमध्ये समावेश आहे.

राष्ट्रीय व आंतरराष्ट्रीय ब्रॅंडचे लहान मुलांचे कपडे, कार्टून्सचे कॅलेंडर अशा विविध ठिकाणी पुण्यातील मुलांचा चेहरा दिसतो. वर्षभरातून शहरातील सुमारे १०० मुले विविध जाहिराती आणि पोर्टफोलिओमध्ये दिसून येतात. त्यामुळे जाहिराती, पोस्टर्ससाठी एका महिन्यात किमान ३ ते ४ मुलांची निवड होते. प्रॉडक्‍शन हाउस किंवा दिग्दर्शक नेहमी नवीन चेहऱ्यांच्या शोधात असतात. त्यामुळे त्यांना अपेक्षित असलेले चेहरे ते नेहमी शोधत असतात. 

मुंबईच्या तुलनेने पुण्यात याबाबत स्पर्धा कमी आहे. त्यामुळे पुण्यातील लहान मुलांचा सहभाग हा जास्त असलेला दिसून येत आहे. पालकांचे अनेक फोटोग्राफर्सकडे लहान मुलांचे पोर्टफोलिओ, व्हिडिओ तयार करून घेण्याचे प्रमाणही वाढले असल्याने ऑडिशन्सद्वारे विविध ठिकाणी झळकण्याची संधी वाढते.

विविध उत्पादनांच्या जाहिरातींसाठी मुंबईच्या तुलनेत पुण्यातील लहान मुलांना मागणी वाढत आहे. दिग्दर्शकांना अपेक्षित निरागस चेहरे पुण्यामध्ये मिळत आहेत. जाहिरातींसाठी आणि पोर्टफोलिओसाठी रोज किमान १० ते १५ फोन येतात. त्यामुळे जाहिरातींमध्ये पुण्यातील लहान मुलांचा सहभाग वाढला आहे.
- श्रीकृष्ण परांजपे, छायाचित्रकार