पुणे : ससून रुग्णालयाच्या शवागारात ठेवलेला महिलेचा मृतदेह नेऊन नातेवाइकांनी त्याच्यावर अंत्यसंस्कार केले खरे; पण तो निघाला दुसऱ्याच महिलेचा. दरम्यान, हा प्रकार या महिलेच्या नातेवाइकांच्या निदर्शनास आल्यानंतर मोठा गोंधळ उडाला. अखेरीस दोन्ही मृतदेहांच्या नातेवाइकांनी सामंजस्याची भूमिका घेतल्याने या प्रकरणावर पडदा पडला.
ससूनच्या शवागारातील शीतगृहामध्ये शुक्रवारी रात्री दोन महिलांचे मृतदेह ठेवले होते. शनिवारी सकाळी साडेसात वाजता एका मृत महिलेचे नातेवाईक शवागारात आले. मृतदेह ओळखताना त्यांची चूक झाली. त्यांनी दुसऱ्याच महिलेचा मृतदेह आपल्या नातेवाईक महिलेचा असल्याचे समजून तो हडपसर येथे नेला. त्यांनी मृतदेहावर अंत्यसंस्कारही केले. दरम्यान, दुसऱ्या महिलेचे नातेवाईक मृतदेह नेण्यासाठी आले. त्या वेळी संबंधित मृतदेह आपल्या नातेवाइकाचा नसल्याचे त्यांच्या लक्षात आले.
सकाळी सात वाजता नेलेला मृतदेह आपल्या नातेवाईक महिलेचा असल्याचे त्यांना समजले. त्यांनी तत्काळ संबंधितांशी संपर्क साधला. मात्र तोपर्यंत मृत महिलेवर अंत्यसंस्कार करण्यात आले होते. त्या नातेवाइकांनी घडलेल्या प्रकाराबाबत रुग्णालय प्रशासनाकडे लेखी दिलगिरी व्यक्त केली, तसेच अंत्यसंस्कार केलेल्या महिलेच्या नातेवाइकांची माफी मागितली. दोन्ही मृत महिलांच्या नातेवाइकांनी या प्रकरणामध्ये सामंजस्याची भूमिका घेत अंत्यसंस्कार झालेल्या महिलेच्या अस्थी त्यांच्याकडे सुपूर्द करून या प्रकरणावर पडदा टाकला.
ससूनच्या शवागारात दोन मृतदेह केवळ ठेवले होते, त्यांचे शवविच्छेदन केलेले नव्हते. शवागारात पहिल्यांदा आलेल्या नातेवाइकांची मृतदेह ओळखण्यात चूक झाली, त्यातून हा प्रकार घडला. या प्रकरणाची चौकशी करण्यासाठी स्वतंत्र समिती स्थापन करण्यात येईल.
- डॉ. अजय चंदनवाले, अधिष्ठाता, बी. जे. वैद्यकीय महाविद्यालय
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.