Ajit Pawar : बारामतीच्या अहिल्याबाई होळकर रुग्णालयाला 55 कोटींच्या 'या' प्रस्तावास मान्यता; अजितदादांनी केला पाठपुरावा

बारामती : येथील पुण्यश्लोक अहिल्याबाई होळकर शासकीय वैद्यकीय महाविद्यालय (Punyashlok Ahilyabai Holkar Government Medical College) व सर्वोपचार रुग्णालय या संस्थेस राज्य योजनेंतर्गत मंजूर अनुदानातून यंत्रसामुग्री व साधनसामुग्री खरेदीस प्रशासकीय मान्यता प्रदान करण्याचा अध्यादेश राज्य शासनाने जारी केला आहे.

यामुळे कर्करोगाने ग्रस्त रुग्णांना किरणोत्सर्गाची थेरपी बारामतीत शासकीय दरात मिळविता येणार आहे. बारामतीतील कॅन्सर हॉस्पिटल (Cancer Hospital) उभारणीच्या दृष्टीने उचललेले पहिले पाऊल म्हणून याकडे पाहिले जात आहे. कर्करोग झालेल्या रुग्णांना या मुळे दिलासा मिळू शकेल.

वैद्यकीय शिक्षण व औषधी द्रव्य विभागाच्या वतीने जारी करणाऱ्या करण्यात आलेल्या अध्यादेशात नमूद करण्यात आले आहे की, पुण्यश्लोक अहिल्याबाई होळकर शासकीय वैद्यकीय महाविद्यालय व सर्वोपचार रुग्णालय या संस्थेस सन 2024-2025 या वित्तीय वर्षात राज्य योजनेंतर्गत मंजूर अनुदानातून रुग्णसेवेकरिता रेडिओथेरेपी विभागात आवश्यक 55 कोटी 73 लाख रूपये किमतीची रेडिऐशन ऑनकोलॉजी युनिट विथ टर्न की ही यंत्रसामुग्री व साधनसामुग्री खरेदीस शासन निर्णयान्वये मान्यता देण्यात आली आहे.

दोनच दिवसांपूर्वी याच शासकीय वैद्यकीय महाविद्यालयास राज्य शासनाने 25 कोटी रुपयांचे एमआरआय मशीन खरेदी करण्याच्या प्रस्तावास देखील शासकीय मान्यता दिली आहे. यामुळे बारामती पंचक्रोशीतील रुग्णांची मोठी सोय होणार आहे. राज्याचे उपमुख्यमंत्री अजित पवार यांच्या पाठपुराव्यातून ही मान्यता मिळाली आहे. सदर प्रशासकीय मान्यता 2024-2025 या आर्थिक वर्षात राज्य योजनेंतर्गत मंजूर तरतूदीमधून उपलब्ध होणाऱ्या निधीतून करण्यात येत आहे.