Pune News: गणेश उत्सवात पुणे मेट्रो 12 वाजेपर्यंत राहणार सुरु; अजित पवारांची माहिती

Ajit Pawar in Pune ganesh festival metro announcement

पुणे- गणपतीत पुणे मेट्रो रात्री १२ वाजेपर्यंत सुरु ठेवण्याचा निर्णय घेण्यात आल्याचं उपमुख्यमंत्री अजित पवार यांनी सांगितलं. सर्व मिरवणुका वेळेत काढण्यासाठी प्रयत्न असेल. गणेश मंडळांसोबत सकारात्मक चर्चा झाली. आयुक्त श्रावण हार्डीकर यांना आवश्यक त्या सुचना दिल्या आहेत, असं अजित पवार म्हणाले. पुण्यातील बैठकीनंतर त्यांनी पत्रकारांची संवाद साधला.

मी आणि पालकमंत्री चंद्रकांत पाटील यांनी आज बैठक घेतली. ७ तारखेला दहीहंडीचा उत्सव आहे. हा सण लोकप्रिय होत आहे. त्यादृष्टीने पोलिसांना सूचना करण्यात आल्या आहेत. गोविंदांना विम्याचे कवच आम्ही दिले आहे. गणेश मंडळांशी सकारात्मक चर्चा झाली. मिरवणुका वेळेत पूर्व व्हाव्यात यासाठी मंडळांना सुचना केल्या आहेत. दगडूशेठ हलवाई गणपतीची मिरवणूक ४: ३० वाजता काढण्यास सांगितलं आहे, अशी माहिती अजित पवार यांनी दिली.

पुण्यात परदेशी पर्यटक येत असतात. त्यामुळे बारकाईने काळजी घेण्यासाठी पोलिस तयार आहेत. मेट्रो रात्री बारावाजेपर्यंत सुरु ठेवली जाणार आहे. विशेषत: ५ ते १० व्या दिवशी ही सेवा बारावाजेपर्यंत सुरु राहील. गणेश मंडळांना एकदा परवानगी घेतल्यास पुन्हा पाच वर्ष परवानगी घ्यायला लागणार नाही. पुण्यामध्ये राज्यासह देशातून लोक येत असतात. त्यामुळे पोलिस आणि प्रशासन यांना तयार राहण्याच्या सुचना देण्यात आल्याचं ते म्हणाले.

अजित पवार यांनी यावेळी बीडमध्ये झालेल्या सभेचा उल्लेख केला. छगन भुजबळ यांनी केलेलं भाषण मला ऐकूच आलं नाही. मी ज्या ठिकाणी बसलो होतो तेथे आवाज ऐकू येत नव्हता. मला कार्यक्रमानंतर मोबाईलवर काही व्हिडिओ पाहण्यात आले. माझं स्पष्ट मत आहे की, कुणाच्या भावना दुखावल्या जाणार नाहीत अशी काळजी नेत्यांनी घ्यायला हवी असं मला वाटतं.

यशवंतराव चव्हाण यांचा वारसा आपण जपतो. महाराष्ट्राची संस्कृती काय हे सर्वांनी पाहावं. पण, मागे काही लोकांनी बोलताना चुकीचे शब्द वापरले. त्यामुळे बोलताना काळजी घ्यावी. सर्व नेत्यांनी या गोष्टीची काळजी घ्यायला हवी. जितके लोक असतात तितके त्यांचे विचार असतात, असं पवार म्हणाले.