अजित पवार म्हणजे दर्जेदार विकास; शरद पवारांकडून शाबासकीची थाप

बारामती : अजित म्हणजे दर्जेदार विकास हे सूत्र आता राज्याला माहिती झाले आहे, कोणतेही काम हातात घेतले की ते उत्तमपणे तडीला न्यायचा अजितचा स्वभाव आहे, पण मला अनेकदा याचा त्रासही होतो. ज्येष्ठ नेते शरद पवार (Sharad Pawar) यांनी आज येथील तालुका पंचायत समितीच्या नूतन वास्तूच्या इमारत उदघाटनानिमित्त आयोजित कार्यक्रमात अजित पवार यांना शाबासकीची थाप दिली. ही थाप देतानाच त्यांनी एका होणा-या गोड त्रासाचाही उल्लेख केला.

आपल्या भाषणात शरद पवार यांनी अजित पवार (Ajit Pawar) यांच्या कार्यशैलीचे मोकळेपणाने कौतुक केले. ते म्हणाले, राज्यात कोठेही गेलो तरी बारामतीसारख्या वास्तू हव्यात असा आग्रह होतो. मध्यंतरी वकील भेटले ते म्हणाले, बारामतीसारखे न्यायालय हवे, विश्रामगृहाची मागणी झाली तीही बारामतीसारखीच, बारामतीचे मेडीकल कॉलेज पाहिल्यानंतर राज्यातील लोक आता अशीच वास्तू आम्हालाही हवी असे म्हणतात.

मेडीकल कॉलेज एका वर्षात देशातील एक उत्तम कॉलेज म्हणून नावारुपाला येईल. बारामती सारख्याच वास्तू हव्यात असा आग्रह लोक धरतात असा तो त्रास असतो असा उल्लेख शरद पवार यांनी हसत केला.

अजित पवार यांनी काम हातात घेतल्यानंतर ते नेटके, सुबक व स्वच्छ असावे असा त्यांचा आग्रह असतो, त्यांच्या प्रयत्नांमुळे बारामतीचा चेहरामोहरा बदलला तसेच या भागातील लोकांचे राहणीमानही बदलले, याचे मला समाधान वाटते, अशा शब्दात शरद पवार यांनी अजित पवार यांची प्रशंसा केली. कोणतेही काम करताना ते उत्तमच असावे हा त्यांचा आग्रह असतो आणि त्याने आज बारामतीचे रुप बदलले दिसते.