Covid 19 : रूग्णांना बेड द्या अन्यथा... महापालिकेचा खासगी हॉस्पिटलला इशारा

पुणे : पुण्यात कोरोनाचे रूग्ण वाढताच, त्यांना सामावून घेण्यासाठी टाळाटाळ करणाऱ्या खासगी हॉस्पिटलच्या मनमानीवर महापालिकेने नजर रोखली आहे. 'रुग्णांना बेड दिले नाही तर ते आम्हीच ताब्यात घेऊ,' असा इशारा महापालिकेने खासगी हॉस्पिटल व्यवस्थापनाला सोमवारी दिला. त्याचवेळी येत्या दोन दिवसांत ४८७ बेड ताब्यात येतील, असा विश्वासही महापालिकेचा आहे.

शहरात कोरोनाचा संसर्ग पसरल्यानंतर खासगी रुग्णालयांत बेड उपलब्ध होत नसल्याचे दिसत आहे. परिणामी, रूग्ण आणि त्यांच्या नातेवाइकांचे प्रचंड हाल होत आहेत. त्याच रोजच्या रूग्णसंख्येचा आकडा हा तीन हजाराच्या घरात जात आहे. या पार्श्वभूमीवर रुग्णांना विशेषतः अत्यवस्थ रुग्णांना बेड देण्याचा महापालिकेचा प्रयत्न आहे. तरीही, खासगी रूणालयांत ते मिळत नसल्याचे दिसत आहे.

या अनुषंगाने खासगी हॉस्पिटल व्यवस्थापनाच्या प्रतिनिधींची सोमवारी बैठक झाली. महापालिका आयुक्त विक्रम कुमार, अतिरिक्त आयुक्त रुबल अग्रवाल, सहायक आरोग्य प्रमुख डॉ. मनिषा नाईक आदी उपस्थित होते. पहिल्या टप्प्यात गरजेनुसार विविध ३० हॉस्पिटलमध्ये दीड हजाराहून अधिक बेड उपलब्ध करण्याचे महापालिकेचे नियोजन आहे. खासगी रुग्णालयांतील बेड ताब्यात घेऊन, त्याठिकाणी रुग्णांना उपचार देण्यासाठी महापालिकेने आता कडक पवित्रा घेतला आहे.

''शहरात रुग्ण वाढल्याने त्यांना सामाविण्यासाठी बेडची गरज आहे. खासगी रुग्णालयांशी चर्चा करूनही ते मिळत नसतील, तर साथरोग नियंत्रण कायद्यातून ते ताब्यात घेतले जातील. त्याआधी बेड देण्याची तयारी हॉस्पिटलने ठेवावी.''
- रुबल अग्रवाल, अतिरिक्त आयुक्त, महापालिका