Pune : हॉटेल व्यावसायिकाला किटली निवडणुक चिन्हामुळे किटलीतील चहा वर आक्षेप आल्याने थर्मास मध्ये चहा आणावा लागला

पारगाव : आंबेगाव तालुक्याच्या पुर्वभागात आज झालेल्या ग्रामपंचायतीच्या निवडणुकीत किटली चिन्हामुळे मतदान केंद्रात निवडणूक कर्मचाऱ्यांना किटलीत चहा घेऊन आलेल्या चहावाल्याला विरोधी उमेदवाराने चहाच्या किटलीवर आक्षेप घेतल्याने किटलीतील चहा परत नेऊन थर्मास मध्ये चहा आणण्याची वेळ आल्याचा गमतीदार प्रसंग एका गावात घडला आहे.

आज तालुक्याच्या पूर्व भागातील काही गावात ग्रामपंचायतीच्या निवडणुका पार पडल्या या निवडणुकीत प्रत्येक उमेदवाराला वेगवेगळे चिन्ह असल्याने या चिन्हावरून गमतीदार प्रसंग घडत आहे. कपबशी हे दैनदिन जीवनात दररोज वापरात येणारी वस्तू असल्याने उमेदवारांची सर्वात जास्त पसंती कपबशीला असते. एका गावात कपबशी चिन्ह असणाऱ्या उमेदवाराने मतदारांना कपबशी वाटल्याची चर्चा आहे तर किटली चिन्ह वाल्या उमेदवाराने किटली वाटल्याचे समजते , केक चे चिन्ह असणाऱ्याने केक व नारळ चिन्ह असल्याने नारळ वाटल्याची माहिती समजली आहे.

एका गावात एका उमेदवाराचा वीट बनवण्याचा कारखाना आहे त्याने वीट चिन्ह , ट्रॅव्हलिंग व्यवसाय असणाऱ्या उमेदवाराने बस चिन्ह तर लाईट व वायरिंग ची कामे करण्याऱ्या उमेदवाराने विजेचा खांब चिन्ह घेतले आहे. गॅस सिलिंडर चा पुरवठा करणाऱ्या उमेदवाराने सिलिंडर चिन्ह घेतले आहे.

आज मतदानाच्या दिवशी एका गावात मतदान केंद्रावरील कर्मचाऱ्यांना हॉटेल व्यवसायिकाने किटलीमध्ये चहा आणला परंतु योगायोगाने तेथील निवडणुकीत एका उमेदवाराचे चिन्ह किटली असल्याने विरोधी उमेदवाराने चहा किटलीत का ? आणला यावर आक्षेप घेतल्याने हॉटेल व्यवसायिकाला कीटलीतील चहा परत नेऊन थर्मास मध्ये चहा ओतून आणावा लागल्याचा गमतीदार प्रसंग घडला आहे.