पुणे : अमित शहांच्या सचिवांनी गिरविले अनास्करांकडून धडे | Sakal
sakal

बोलून बातमी शोधा

Amit Shah
पुणे : अमित शहांच्या सचिवांनी गिरविले अनास्करांकडून धडे

पुणे : अमित शहांच्या सचिवांनी गिरविले अनास्करांकडून धडे

पुणे : देशाचे गृहमंत्री अमित शहा (Amit Shah Minister of Home Affairs)राजकारणातले चाणक्य म्हणून ओळखले जातात. त्यांचा भाजपसह राजकीय वर्तुळातील दबदबा कुणापासूनच लपून राहिलेला नाही. नरेंद्र मोदींच्या (Narendra Modi)आजवरच्या प्रवासाचे चाणक्य म्हणून त्यांना ओळखले जाते. केंद्र सरकारने नुकतेच सहकार मंत्रालय स्थापन केले आहे. विशेष म्हणजे या महत्त्वपूर्ण मंत्रालयाचे पहिले मंत्री म्हणून शहांकडे जबाबदारी देण्यात आली आहे. राजकारणातील हा चाणक्य नुकताच राधाकृष्ण विखे पाटलांच्या लोणी मतदारसंघात आयोजित सहकार परिषदेत आले होते. याच कार्यक्रमात महाराष्ट्र राज्य सहकार परिषदेचे अध्यक्ष विद्याधर अनास्कर यांनी हिंदीत भाषण (hindi speech)केले. या अभ्यासपूर्ण भाषणानंतर अमित शहांनी जो निर्णय घेतला तो सर्वांनाच अचंबित करणारा ठरला आहे.

हेही वाचा: NEET PG प्रवेश प्रक्रियेला १२ जानेवारीपासून सुरुवात; आरोग्य मंत्र्यांची घोषणा

रविवारी (ता.९) पुण्यात आयोजित एका कार्यक्रमात खुद्द अनास्करांनी या किश्याला पुष्टी दिली आहे. त्याचं झालं अस, देशाचे पहिले सहकारमंत्री म्हणून अमित शहा लोणी (जिल्हा - नगर) येथे आयोजित सहकार परिषदेला आले होते. २०१४ पासूनच राज्य सहकारी बॅंक असेल किंवा सहकार परिषद असेल यांच्या अध्यक्षपदी अनास्कर यांची नियुक्ती करण्यात आली आहे. सहकारातील दांडगा अनुभव, बॅंकींगचे ज्ञान आणि सहकाराविषयची तळमळ पाहता अनास्कर यांना सर्वच पक्षांकडून आदराची वागणूक दिली जाते. म्हणूनच महाविकास आघाडीच्या सरकारने त्यांना राज्यमंत्रीपदाचा दर्जा दिला आहे. लोणी येथे आयोजित परिषदेत अनास्कर यांनी सहकारी बॅंकांसमोरील अडचणी, त्याचा सर्वसामान्य लोकांवर होणारा परिणाम, रिझर्व्ह बॅंकेची चुकीची धोरणे आणि सहकाराचा दबलेला आवाज शहा यांच्या समोर मांडला. त्यांचे अभ्यासपूर्ण भाषण आणि सहकाराच्या दांडग्या अनुभवाने अमित शहा प्रभावित झाले.(Pune news)

हेही वाचा: ...तर बार आणि दारूची दुकाने करावे लागतील बंद - राजेश टोपे

गुजरातमधील सहकाराचा अनुभव असतानाही अनास्करांच्या अभ्यासपूर्ण भाषणाने शहांवर झालेला प्रभाव त्यांना स्वतःला लपविता आला नाही. जेवणाच्या वेळी शहा यांनी अनास्करांशी अनेक विषयांवर चर्चा केली आणि एक महत्त्वपूर्ण निर्णय घेऊन टाकला. अनास्करांच्याच भाषेत सांगायचे ठरले तर ,‘‘मेरी हिंदी अच्छी नही है, लेकिन आपको बताना जरुरी है, असे म्हणत मी भाषण केले. शहांनी ते समजून घेतले. म्हणूनच त्यांनी जेवणावेळीही आमच्याशी संवाद साधला. शहा स्वतः दिल्‍लीला गेले मात्र त्यांनी त्याचे एक सचिव पुण्यात थांबविले. विद्यापीठाजवळील वैकुंठ मेहता सहकारी प्रबंध संस्था (व्यामनीकॉम) येथे संपूर्ण दिवसभर आम्ही चर्चा केली. शहांच्या सचिवाने सर्व गोष्टी समजून घेतल्या, सविस्तर चर्चेनंतर ते दिल्लीला गेले.’’ सहकार क्षेत्राचे ऐकून घेण्याची भूमिका केंद्र सरकारची दिसत आहे. निश्चितच ती स्वागतार्ह असल्याचीही भावना अनास्कर यांनी व्यक्त केली. सहकारातील अडीअडचणी समजून घेण्यासाठी अमित शहांच्या सचिवाने अनास्करांकडून गृहपाठ गिरवला असे म्हणायला काही हरकत नाही.

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top