Swadhar Yojana Pune : स्वाधार योजनेसाठी आजच करा अर्ज

पुणे : उच्च शिक्षण घेत असलेल्या परंतु वसतीगृहात प्रवेश मिळाला नाही अशा विद्यार्थ्यांसाठी ‘स्वाधार’ योजना मोठा आधार ठरते. इतर मागास वर्ग, विमुक्त जाती, भटक्या जमाती व विशेष मागास प्रवर्गातील विद्यार्थ्यांना अर्ज करता येणार आहे.

महापालिका, जिल्हा किंवा तालुकास्तरीय शिक्षण संस्थांमध्ये उच्च शिक्षण घेणाऱ्या विद्यार्थ्यांसाठी ज्ञानज्योती सावित्रीबाई फुले आधार योजना राबविण्यात येते. इतर मागास बहुजन कल्याण विभागामार्फत ही योजना राबविण्यात येते. पात्र विद्यार्थ्यांना भोजन, निवासभत्ता, निर्वाह भत्ता उपलब्ध करून देण्यात येतो. मोठ्या शहरापासून ते छोट्या शहरापर्यंत निर्वाह रक्कम बदलते. यासाठी पालकांचे उत्पन्न अडीच लाख रुपयांपेक्षा कमी असायला हवे.

योजनेचा लाभ घेण्यासाठी विद्यार्थ्यांनी अर्ज सादर करावे, असे आवाहन सहायक संचालक विशाल लोंढे यांनी केले आहे. महाविद्यालयांमध्येही या योजनेचे अर्ज उपलब्ध करून देण्यात येणार आहेत. तसेच विश्रांतवाडी येथील डॉ. बाबासाहेब आंबेडकर सामाजिक न्याय भवनात अर्ज उपलब्ध आहे. पात्र ठरण्यासाठी विद्यार्थ्यांनी अटी व शर्तींची पूर्तता करणे गरजेचे आहे.

स्वाधारचा आधार...

• - पुणे, पिंपरी चिंचवड, नागपूर, मुंबई सारख्या शहरांत : ६०,००० रुपये

• - महसुल विभागीय शहर किंवा गट क वर्ग महापालिका क्षेत्र : ४३,००० रुपये

• - तालुक्याला शिक्षण घेणारे विद्यार्थी : ३८,००० रुपये

शैक्षणिक वर्ष : अर्ज करण्याची अंतिम तारीख

• - पदवीचे द्वितीय, तृतीय व चतुर्थ वर्ष : ३१ जुलै

• - प्रथम वर्ष : २० ऑगस्ट