सैन्यदलाच्या वतीने महाराष्ट्र ते जम्मू-काश्‍मीर ‘बाईक रॅली’चे आयोजन

स्वातंत्र्याच्‍या अमृतमहोत्सवी वर्षानिमित्त सैन्यदलातर्फे बाईक रॅली आयोजित
bike rally
bike rallysakal

पुणे : सैन्यदलाच्या २८ इनफन्ट्री डिव्हिजनच्या वतीने महाराष्ट्र ते जम्मू-काश्‍मीर अशा आगळ्यावेगळ्या ‘बाईक रॅली’चे आयोजन केले होते. या उपक्रमांतर्गत नाशिक ते जम्मू-काश्‍मीरच्या मच्छल गावातील नियंत्रण रेषेपर्यंत, तीन दिवसांचा हा उपक्रम उत्साहात पार पडला. यामध्ये एकूण ६० दुचाकीस्वारांनी सहभाग घेतला. यातील ४५ दुचाकीस्वार मच्छल येथील स्थानिक होते. स्थानिकांना मुख्य प्रवाहात आणण्यासाठी, तसेच मच्छल या भागाला साहसी पर्यटनस्थळ म्हणून ओळख मिळावी, या अनुषंगाने हा उपक्रम सैन्यदलाद्वारे राबविण्यात आला.

स्वातंत्र्याच्‍या अमृतमहोत्सवी वर्षानिमित्त सैन्यदलातर्फे विविध उपक्रम राबविण्यात येत असून, त्याचाच एक भाग म्हणून ही बाईक रॅली आयोजित केली होती. या मोहिमेत नाशिक येथून १५ दुचाकीस्वारांनी सुमारे अडीच हजार किलोमीटरचा प्रवास केला. या प्रसंगी सैन्यदलाच्या वतीने रमजाननिमित्त दुचाकीस्वार आणि स्थानिकांसाठी इफ्तारचेदेखील नियोजन करण्यात आले.

खेळ, साहसी उपक्रम आणि इतर उपक्रमांची कमतरता यामुळे अशा दुर्गम भागामधील नागरिकांचे मानसिक व शारीरिक विकासावर परिणाम होत असून, दैनंदिन उपजीविकेसाठी आवश्यक पायाभूत सुविधांपासून स्थानिक वंचित आहेत. ही समस्या पाहता सैन्यदलातर्फे मच्छल या दुर्गम गावातील स्थानिकांसाठी विविध उपक्रम, मदतकार्य तसेच, त्यांना आवश्‍यक त्या सुविधा पुरविण्यात येत आहेत. येथील पर्यटनाला चालना मिळाल्यास स्थानिकांना उत्पन्नाचा पर्याय उपलब्ध होइल, असा विश्‍वास सैन्यदलाने व्यक्त केला आहे.

दरम्यान, जून महिन्यात मच्छल येथे महिला व मुलींसाठी बाईक व कार रॅली, तसेच मॅरेथॉनचे आयोजन करण्यात येणार आहे. येथील महिला मुलींमध्ये आत्मविश्‍वास वाढावा व महिलांनादेखील आपल्या शक्तीचे प्रदर्शन करता यावे, यासाठी हा उपक्रम ठेवला जाणार असल्याचे सैन्यदलातील अधिकाऱ्यांनी सांगितले.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com