पुणे - कोथरूडमधून अटक करण्यात आलेल्या दहशतवाद्यांना आश्रय देणाऱ्या व्यावसायिकाला पैसे पाठविणाऱ्या मेकॅनिकल इंजिनिअरला दहशतवाद विरोधी पथकाने (एटीएस) शनिवारी अटक केली. त्याने अब्दुल पठाण याला पैसे पाठवले. ते पैसे पठाणने दोन्ही दहशतवाद्यांना टेरर फंडिंगसाठी दिल्याचे तपासात स्पष्ट झाले आहे.
सिमाब नसरुद्दीन काझी (वय २७, रा. कौसरबाग, कोंढवा, मूळ रा. पंढरी रत्नागिरी) असे अटक करण्यात आलेल्या मेकॅनिकल इंजिनिअर तरुणाचे नाव आहे. या गुन्ह्यात आत्तापर्यंत एकूण चौघांना अटक करण्यात आली आहे.
कोथरूडमधून दुचाकी चोरीच्या प्रयत्नात असताना महम्मद इम्रान महम्मद युसूफ खान (वय २३) आणि महम्मद युसूफ महम्मद याकूब साकी (वय २४, दोघेही रा. चेतना गार्डन, मिठानगर, कोंढवा. मूळ रा. रतलाम, मध्यप्रदेश) यांना अटक करण्यात आली होती. त्यांच्या घराची झडती घेतल्यानंतर त्यांचे दहशतवादी कनेक्शन पुढे आले आहे.
त्या दोघांना आश्रय देणाऱ्या अब्दुल कादीर दस्तगीर पठाण (वय ३२, रा, कोंढवा) याला देखील अटक करण्यात आली आहे. सिमाब काझी याला शनिवारी (ता. २९) न्यायालयात हजर करण्यात आले. न्यायालयाने त्याला पाच ऑगस्टपर्यंत एटीएस कोठडी सुनावली आहे.
यापूर्वी अटक करण्यात आलेल्या तिघांची एटीएसकडून एकत्रित चौकशी करण्यात आली. त्यात अब्दुल पठाण याला रत्नागिरीतील एकाने आर्थिक रसद पुरवल्याची माहिती तपासामध्ये पुढे आली होती. ती व्यक्ती सिमाब काझी असल्याचे स्पष्ट झाल्यानंतर एटीएसने त्याला चौकशीसाठी बोलावले होते. त्याने दहशतवाद्यांना आर्थिक रसद पुरवली असल्याचे चौकशीत स्पष्ट झाले. त्यामुळे त्याला अटक करण्यात आली.
सिमाबने टेरर फंडिंगसाठी किती पैसे दिले आहेत? त्याला आणखी कोणी मदत केली? याचा तपास करायचा असल्याने विशेष सरकारी वकील विजय फरगडे तसेच तपास अधिकारी सहायक पोलिस आयुक्त अरुण वायकर यांनी त्याच्या एटीएस कोठडीची मागणी केली.
सिमाब काझी याने अब्दुल पठाण याला त्याच्या बँक खात्यावर पैसे पाठविले. ते पैसे पठाण याने महम्मद खान आणि महम्मद साकी यांना टेरर फंडिंगसाठी दिले, असे वायकर यांनी न्यायालयास सांगितले. आरोपीच्यावतीने ॲड. यशपाल पुरोहित यांनी काम पाहिले.
कोण आहे सिमाब काझी -
काझी हा मूळचा रत्नागिरी जिल्ह्यातील पंढेरी गावाचा रहिवासी आहे. त्याने मेकॅनिकल इंजिनिअरिंगचे शिक्षण घेतले आहे. तो एका नामांकित कंपनीत कामाला असून त्याला १५ लाख रुपयांचे पॅकेज आहे. सध्या तो कोंढवा भागात राहायला आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.