जुन्नर :पंढरपूर पायी वारीत चालून चालून थकलेल्या वारकऱ्यांचे कलेच्या माध्यमातून मनोरंजन करण्याबरोबर समाज प्रबोधन करण्याचे काम विकास घोगरे नावाचा अवलिया करत आहे. येणेरे ता.जुन्नर येथील नंदनवन संस्थेच्या माध्यमातून घोगरे दिव्यांगासाठी विशेष शिक्षकाचे काम करतात. गेल्या तीन वर्षांपासून अहिल्यानगर मार्गे जाणाऱ्या वैष्णव सेवा भक्त मंडळ दिंडीमध्ये संस्थेतील दिव्यांग मुलांना घेऊन सहभागी होत असतात. नंदनवन प्रकल्पांतर्गत १८ वर्षांपासून घोगरे दिव्यांग मुलांचा सांभाळ करत आहेत. यावर्षी देखील संस्थेतील तीन मुलांना सोबत घेऊन पायी वारीत सहभागी झाले आहेत.