तरडगाव : फडफडणाऱ्या पताका, टाळ-मृदंगाचा गजर व हरिनामाचा जयघोष अशा भक्तिमय वातावरणात माउलींच्या अश्वाने रंगविलेले रिंगण लाखो भाविकांनी चांदोबाच्या लिंबाजवळ अनुभवले. .संत ज्ञानेश्वर महाराज पालखीचा लोणंदमध्ये यंदा एकच मुक्काम होता. त्यामुळे पश्चिम महाराष्ट्रातील भाविकांनी मोठ्या संख्येने लोणंदमध्ये गर्दी केली होती. स्थानिक प्रशासनाने केलेल्या उत्तम नियोजनामुळे भाविकांना दर्शन सुलभ झाले. पालखी दुपारी निघणार असल्याने लोणंदकरांनी माउलींना वाजतगाजत पुरणपोळीचे नैवेद्य आणले. माउलीसमोर सकाळी मानाचे कीर्तन झाले. दुपारी एकच्या सुमारास लोणंदकरांनी पालखी खांद्यावर घेऊन रथात ठेवली आणि सोहळा तरडगावकडे मार्गस्थ झाला. दुपारी साडेतीनच्या सुमारास माउलींचा रथ चांदोबाच्या लिंब मंदिराच्या पुढे थांबला..रथ मध्यभागी उभा केल्यानंतर. भोपळे दिंडीतील मानकऱ्याने पताका धावत नेली आणि रिंगण सोहळा सुरू झाला. स्वाराचा अश्व मागे आणि माउलींचा अश्व पुढे धावत होता. अश्वांनी रथाला फेरी मारत रिंगण पूर्ण केले. रथाजवळ देवस्थानतर्फे भावार्थ देखणे, योगी निरंजननाथ, पुरुषोत्तम पाटील यांनी अश्वांना नारळप्रसाद दिला. रिंगणात ऊर्जितसिंह शितोळे सरकार, चैतन्य कबीर, राजेंद्र उमाप, रोहिणी पवार, राजाभाऊ आरफळकर, रामभाऊ चोपदार, राजाभाऊ चोपदार उपस्थित होते. रिंगण होताच अश्वांच्या टापाखालची माती कपाळी लावण्यासाठी मोठी झुंबड उडाली. दिंड्यांमधील वारकऱ्यांनी फुगड्या, हुतूतू, कोंबडा, झिम्मा, वारकरी पावक्या आदी खेळ खेळले. रिंगण सोहळा झाल्यावर पालखी तरडगाव मुक्कामी पोचली..वाल्हे ते लोणंद वाटचालीत पुणे पोलिस आणि सातारा पोलिस यांच्या समन्वयाअभावी वाहतूक कोंडी झाल्याने दिंड्यांनी नाराजी व्यक्त केली होती. त्यामुळे पोलिसांनी नियोजन करून दिंड्यांची वाहने प्राधान्याने पालखी मार्गाच्या उजव्या बाजूने सुरळीत काढली. त्यासाठी स्वतः पोलिस अधीक्षक तुषार दोशी यांनी रस्त्यावर उतरून नियोजन केले होते..टाळ वाजवून तक्रारउभ्या रिंगणावेळी मानाचे अश्व रथाच्या मागील दिंड्यांमध्ये न गेल्याने समाजआरतीच्या वेळी काही दिंड्यांनी टाळ वाजवून तक्रार नोंदवली. याबाबत, ‘‘आपत्कालीन कारणास्तव अश्व मागे जाऊ शकले नाहीत. याबाबत समाधानकारक खुलासा दिंड्यांना केलेला आहे,’’ अशी माहिती सोहळा प्रमुख डॉ. भावार्थ देखणे यांनी दिली..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
