कागदपत्रावर स्वाक्षरी न केल्याने माजी सरपंचाला मारहाण
सकाळ वृत्तसेवा
सोलापूर, ता. २२ ः कागदपत्रावर स्वाक्षरी न केल्याने एकाने सळईने माजी सरपंचावर हल्ला केला. त्यात ते जखमी झाले. शनिवारी (ता. २२) सकाळी नऊच्या सुमारास देवडी (ता. मोहोळ) येथे ही घटना घडली. अंकुश बाळू शिंदे (वय ५०, रा. देवडी) असे माजी सरपंचाचे नाव आहे.
अंकुश शिंदे गावातील दूध संकलन केंद्राजवळ थांबले होते. त्यावेळी धनाजी मारुती नाईकवाडी याने काही कागदपत्रे देऊन त्यावर स्वाक्षरी करण्यास सांगितले. माझी सरपंचपदाची मुदत संपली असून ग्रामपंचायतीवर प्रशासक आहे. त्यामुळे मी स्वाक्षरी करू शकत नाही, असे शिंदे यांनी सांगितले. त्यावर चिडून धनाजी याने सळईने व लाथाबुक्क्यांनी त्यांना मारहाण केली. त्यात डाव्या डोळ्याला मार लागून ते जखमी झाले. तसेच मुकामार लागला. त्यांना उपचारासाठी शासकीय रुग्णालयात दाखल करण्यात आले आहे. याची सिव्हिल पोलिस चौकीत नोंद झाली आहे.
