नारायणगाव : खंडणीचा गुन्हा दाखल झालेल्या आरोपीकडून आत्महत्येचा प्रयत्न

नारायणगाव (पुणे) : युट्युब चॅनेलच्या पत्रकारांवर नारायणगाव पोलिसांनी दाखल केलेल्या खंडणीच्या गुन्ह्याची चौकशी करण्याचे आदेश उपविभागीय अधिकारी दिपाली खन्ना यांना देण्यात आले आहेत. या गुन्ह्याचा तपास करून सत्य शोधून काढले जाईल. कोणावरही अन्याय होणार नाही. पुरावा नसेल, तर खंडणीच्या गुन्ह्यातून आरोपींचे नाव कमी करण्यात येईल, अशी माहिती पुणे ग्रामीणचे पोलिस अधीक्षक संदीप पाटील यांनी जुन्नर येथे पत्रकारांना दिली.

ताज्या बातम्यांसाठी डाऊनलोड करा ई-सकाळचे ऍप 

जुन्नर टाइम्स युट्यूब चॅनलचे संपादक संदीप उतरडे व त्याचे सहकारी पत्रकार सचिन जाधव-मोरे (पूर्ण नाव माहीत नाही) व एक अनोळखी व्यक्ती आशा चार जणांवर नारायणगाव पोलिस ठाण्यात खंडणीचा गुन्हा दाखल झाला आहे. उतरडे याला अटक केली असून, त्याला सात दिवसांची पोलिस कोठडी देण्यात आली आहे. दरम्यान, खंडणीचा गुन्हा दाखल झालेले मोरे याने आज सकाळी झोपेच्या गोळ्या घेऊन आत्महत्या करण्याचा प्रयत्न केला. त्याच्यावर नारायणगाव येथील खासगी रुग्णालयात उपचार सुरू आहेत. त्यामुळे या प्रकरणाची सोशल मीडियावर सध्या जोरदार चर्चा सुरू आहे. 

पुण्याच्या बातम्या वाचण्यासाठी येथे क्लिक करा

गुन्हा दाखल झाल्यानंतर त्याचा तपास करणे, ही बाब न्याय प्रविष्ट असताना काही राजकीय व्यक्तींनी या घटनेत आपले राजकीय उखळ पांढरे करण्याचा प्रयत्न सुरू केला आहे. दरम्यान आज शांतता कमिटीच्या बैठकीसाठी पोलिस अधीक्षक संदीप पाटील हे जुन्नर येथे आले होते. यावेळी या प्रकरणाबाबत पत्रकरांनी त्यांच्याशी संवाद साधला. यावेळी आमदार अतुल बेनके उपस्थित होते. 

पाटील म्हणाले, की फिर्याद दिल्यानंतर गुन्हा दाखल होणे, ही प्रक्रिया आहे. गुन्हा व्यवस्थित दाखल केला आहे का, याची चौकशी उपविभागीय अधिकारी खन्ना करतील. गुन्हा दाखल झाल्यानंतर तपासाला सुरुवात होईल. तपासाचा उद्देश खरे शोधून काढणे हा असतो. पुरावा नसेल, तर गुन्ह्यातून आरोपींचे नाव कमी करण्यात येते. या प्रकरणाचा सखोल तपास होईल. कोणावरही अन्याय होणार नाही, अशी ग्वाही या वेळी पाटील यांनी दिली.