मलकापुर: ; चार जणांविरुद्ध गुन्हा दाखल

मलकापुरात तरुणावर कुऱ्हाडीने हल्ला

मलकापूर, ता. १७ : येथील अहिल्यानगर परिसरात काल रात्री दहा वाजण्याच्या सुमारास जुन्या वादातून एका तरुणावर कुऱ्हाडीने हल्ला केल्याची घटना घडली. विघ्नेश जयवंत शेवाळे असे जखमी तरुणाचे नाव आहे.
याबाबत माहिती अशी, की जीवन नथुराम गावडे याने कुऱ्हाडीने विघ्नेशच्या पाठीवर व डाव्या हातावर वार केल्याचा आरोप आहे. यावेळी चिक्या येडगे व एक अनोळखी युवक यांनी संगनमताने हल्ल्यास साथ दिल्याचे सांगण्यात आले आहे. जनावरांच्या गोठ्यातील मलमूत्राची विल्हेवाट लावण्याच्या वादातून हा हल्ला झाल्याचे तक्रारीत नमूद आहे. हल्ला थांबविण्याचा प्रयत्न करत असताना आई-वडिलांच्या हातालाही कुऱ्हाडीने दुखापत झाली. घटनेनंतर जखमींना उपचारासाठी कऱ्हाड येथील रुग्णालयात दाखल करण्यात आले. याप्रकरणी शीतल जयवंत शेवाळे यांनी कऱ्हाड शहर पोलिस ठाणे येथे फिर्याद दाखल केली आहे. पोलिसांनी जीवन नथुराम गावडे, चिक्या येडगे व एका अनोळखी व्यक्तीविरुद्ध गुन्हा दाखल केला आहे. घटनेचा पुढील तपास कऱ्हाड शहर पोलिस करीत आहेत.
.....