''बाबासाहेबांनी सांगितलेला इतिहासातील प्रसंग डोक्यात फिट होतो''

पुणे- शिवशाहीर बाबासाहेब पुरंदरे यांच्या 100 व्या वाढदिवसानिमित्त शुक्रवारपासून अनेक कार्यक्रमांचे आयोजन करण्यात आले आहे. आज बाबासाहेबांच्या 'ओंजळ' या पुस्तकाचे प्रकाशन करण्यात आले. यावेळी प्रसिद्ध गायिका आशा भोसले, महाराष्ट्र नवनिर्माण सेना प्रमुख राज ठाकरे आणि भाजप नेते आशिष शेलार उपस्थित होते. यावेळी बाबासाहेबांच्या सत्कार कार्यक्रमात राज ठाकरे म्हणाले की, 'मी सहा वर्षाचा असताना बाबासाहेबांना पहिल्यांदा पाहिलं होतं. त्यांना पाहत होतो, वाचत होतो. त्यानंतर माझ्या नशिबाने मी त्यांना भेटू शकलो. त्यांच्या सहवासात राहू शकलो. महाराजांची भूमिका बाबासाहेबांनी पार पाडलेली मी पाहिलं आहे. मी भाग्यवान आहे.'

बाबासाहेबांना खूपदा भेटलोय. इतिहासाचे अनेक प्रश्न त्यांच्याकडून समजून घेतले. शिवचरित्रात मला सगळ्यात जास्त आवडणारी गोष्ट म्हणजे, ते इतिहास सांगत असले तरी वर्तमानात कसं भानावर यावं ते सांगत असतात. इतिहासातून काय चुका करु नये हे ते सांगत असतात. इतिहासाचा आणि वर्तमानाचा संबंध असावा. नुसताच इतिहास ऐकल्यास रुक्ष वाटतो. पण, बाबासाहेब जसा प्रसंग सागतात तो इतिहासाचा क्षण डोक्याट फिट होते, असं ठाकरे म्हणाले.

इतिहासाबरोबर वर्तमानाची जाग आणणारे बाबासाहेब महापुरुष आहेत. शिवचरित्र इतिहास म्हणून वाचण्याचा काही अर्थ नाही. बाबासाहेब इतिहासातून काही गोष्टी सांगण्याचा प्रयत्न करत असतात. तो समजून घेतला नाही तर फक्त इतिहास राहतो. बाबासाहेबांच्या घरी तळघरात ते एकटे बसले होते. तेथे जुनी हजारो तलवारी होत्या. बाबासाहेब ते घेऊन साफ करत बसले होते. त्यावर काही छिद्रे होती. एका छिद्राचा अर्थ १०० माणसे मारली. ते सर्व पाहून मला अभिमान वाटला. बाबासाहेब समजेल, रुचेल अशाप्रकारे इतिहास ते सांगत असतात, असं ते म्हणाले.

बाबासाहेबांनी कधी इतिहासाला सोडलं नाही. त्यांनी दंतकथेला वाव दिला नाही. पण, प्रसंग सांगताना त्यांनी अलंकारिक भाषा वापरली म्हणून ती आपल्याला निटपणे समजू शकली. देवगिरी किल्ल्यात मुघलांना शिरण्यात किती कठीण होतं हे सांगतात बाबासाहेब सांगतात रावणाला शितेच्या हृदयात शिरणं जितकं कठीण होतं तितकं मुघलांना ते कठीण होतं. गोष्टी पक्की करण्यासाठी ते हे करत असतात. आमचे नातवंडं-पतवडं तुमच्याकडूनच इतिहास शिकत राहतील इतकं आयुष्य तुम्हाला मिळो अशी मी इश्वर चरणी प्रार्थना करतो, अशा शुभेच्छा राज ठाकरे यांनी दिल्या.

आशिष शेलार काय म्हणाले?

बाबासाहेबांचे कौतुक करावे तितके कमी आहे. त्यांचा एक गुण मला खूप आवडतो. तो म्हणजे सहनशीलता आणि दुसऱ्याला क्षमा करण्याचा स्वभाव. मला कोणत्याही वादात जायचं नाही. पण, तुमच्या लेखनावर काही नतदृष्टांनी सपासप वार केले, भीम प्रहार केले पण तुम्ही काही न बोलता सहन करुन दाखवलं. बाबासाहेबांनी आदर्श जीवन जगलं. त्यांच्याकडून जितकी प्रेरणा घ्यावी तितकी कमी आहे. काहीजण अजातशत्रू असतात, तसे बाबासाहेब आहेत. त्यांनी शिवचरित्रासाठी आपला जीवन वाहून घेतलं आहे. ऋषीतुल्य असं व्यक्तीमत्व बाबासाहेबांचे आहे, असं भाजप आमदार आशिष शेलार म्हणाले.