बालगंधर्वमध्ये ५ मेपासून ‘आमचेही फटकारे’ प्रदर्शन

पुणे, ता. २८ : बाळासाहेब ठाकरे यांच्या जन्मशताब्दीनिमित्त देशभरातील नामवंत व्यंग्यचित्रकार आणि चित्रकारांनी आपापल्या शैलीतून रेखाटलेल्या ठाकरे यांच्यावरील चित्र व अर्कचित्रांच्या प्रदर्शनाचे आयोजन केले आहे. ‘आमचेही फटकारे’ या नावाचे हे प्रदर्शन मंगळवारी (ता. ५) व बुधवारी (ता. ६) सकाळी १० ते रात्री ८ या वेळेत बालगंधर्व कलादालनात होणार आहे.
कार्टून कट्टा - महाराष्ट्र व्यंगचित्रकार समूह आणि महाराष्ट्र नवनिर्माण विद्यार्थी सेनेतर्फे हे प्रदर्शन भरविण्यात येत आहे. यात देशभरातील १२० चित्रकारांनी रेखाटलेली निवडक २०० चित्रे व अर्कचित्रे पाहायला मिळणार आहेत. यात आर. के. लक्ष्मण, मंगेश तेंडुलकर, मारिओ मिरांडा आदी व्यंग्यचित्रकारांचा समावेश आहे. प्रदर्शनातील दोन्ही दिवस निमंत्रित चित्रकार व व्यंग्यचित्रकारांची प्रात्यक्षिके आणि चर्चासत्रे होणार आहेत. यात घनश्याम देशमुख, चारुहास पंडित, विनय चानेकर आदी सहभागी होणार आहेत. प्रदर्शनादरम्यान कार्यशाळा होणार असून, प्रदर्शन व कार्यशाळा विनामूल्य आहे.