Pune News : निष्काळजीपणे इमारत पाडल्याने बांधकामावर घातली बंदी

पुणे/कोथरूड - कोथरूडच्या शिवतीर्थनगरमध्ये जुनी इमारत पाडताना कोणतीही काळजी न घेता थेट आख्खी इमारत पाडण्यात आल्याचा धक्कादायक प्रकार समोर आला आहे. याप्रकरणी बांधकाम विभागाने संबंधित बांधकाम व्यावसायिकाला नोटीस बजावून काम थांबविण्याचे आदेश दिले आहेत.

शिवतीर्थनगर मध्ये एका सोसायटीची जुनी इमारत पाडून तेथे नवीन इमारत बांधली जाणार आहे. याचे काम घेतलेल्या बांधकाम व्यावसायिकाने ठेकेदारामार्फत ही जुनी इमारत पाडण्याचे काम सुरू केले होते. अशावेळी इमारत पाडताना वरच्या भागापासून पाडत येणे आवश्‍यक आहे. पण ही इमारत थेट खालून पाडल्याने मोठा भाग कोसळला.

त्यामुळे मोठा आवाज होत मोठी धुळ उडाली, दगड, खडे उडाले. त्यावेळी रस्त्यावर उभे असलेले नागरिक जीव वाचविण्यासाठी घाबरून पळाले. या धुळीच्या लोटामध्ये अडकलेली दुचाकीस्वार महिला सुदैवाने बचावली. या घटनेमध्ये कोणतीही जीवितहानी झालेली नसली तरी प्रत्यक्षदर्शींमध्ये प्रचंड घबराट निर्माण झाली. याप्रकरणी आज महापालिकेकडे तक्रारी प्राप्त झाल्याने संबंधित बांधकाम व्यावसायिकास पुढील आदेशापर्यंत बांधकाम थांबविण्याचे आदेश दिले आहेत.

स्थानिक नागरिक श्रीपाद चिकणे म्हणाले,र'‘इमारतीचा पुनर्विकास करण्यासाठी ती खाली करण्यात आली होती. ठेकेदाराकडून इमारत पाडण्याचे काम सुरू असताना इमारतीचा मोठा भाग पडला. सगळा राडारोडा रस्त्यावर आला होता तो आम्ही बाजूला केला.

सुनील मराठे म्हणाले की, ‘रस्त्यावर वर्दळ असताना अशी कामे करताना खबरदारी घेणे अपेक्षित होते. पण येते कोणतेही नियोजन नव्हते.

कोथरूड पोलिस ठाण्याचे वरिष्ठ निरीक्षक हेमंत पाटील यांनी याप्रकरणात आमच्याकडे कोणतीही तक्रार आली नसल्याचे सांगितले.

शिवतीर्थ नगरमधील इमारतीचे पुर्नबांधकामासाठी काम सुरू असताना इमारत पडल्याचा प्रकार घडला आहे. याप्रकरणी संबंधित बांधकाम व्यावसायिकास काम थांबविण्याचे आदेश देण्यात आली आहेत. याप्रकरणी कारवाई केली जाईल.’

- प्रशांत वाघमारे, शहर अभियंता, महापालिका