आर्थिक पत राखण्यासाठी बॅंकेचे नियम कठोर व्हावेत - एरिक मस्किन

पुणे - ‘एका तपापूर्वी आलेल्या जागतिक मंदीचे परिणाम अजूनही भोगावे लागत आहेत. त्यामुळे अनेक सुधारणा आवश्‍यक असून, त्यात बॅंकेच्या नियमांमध्ये कठोरता येणे गरजेचे आहे,’’ असे मत नोबेल पुरस्कार विजेते अर्थतज्ज्ञ प्रा. एरिक मस्किन यांनी व्यक्त केले.

ताज्या बातम्यांसाठी डाऊनलोड करा ई-सकाळचे ऍप

गोखले राज्यशास्त्र आणि अर्थशास्त्र संस्थेत २६वा पदवीप्रदान समारंभ आयोजित केला होता. त्या वेळी ते बोलत होते. ‘इंट्रोडक्‍शन ऑफ मेकॅनिझम डिझाइन’ (यंत्रणा आराखडा) या विषयावर बोलताना मस्किन म्हणाले, ‘‘२००७-८ मध्ये जागतिक मंदीमुळे अनेक देशांना फटका बसला. अनेक बॅंका बंद पडल्या. यातून आपण अद्याप पूर्णपणे सावरलेलो नाहीत. अधूनमधून त्याचे परिणाम दिसतात. यातून मार्ग काढण्यासाठी व पत चांगली ठेवण्यासाठी बॅंकांच्या नियमांमध्ये सुधारणा आवश्‍यक आहे. त्यासाठी अपेक्षित परिणामांचा अंदाज घेऊन मेकॅनिझम डिझाइन होणेही आवश्‍यक आहे.’’ 

पुण्याच्या बातम्या वाचण्यासाठी येथे ► क्लिक करा

अमेरिका व भारत हे लोकशाही देश असले, तरी येथे ३० ते ४० टक्के मत मिळवणारा सत्तेत येतो. परंतु ६० ते ७० टक्के मतदार त्याच्या विरोधात असतात. याचा विचार करून त्या पद्धतीने यंत्रणा तयार केल्यास त्यात काही प्रमाणात बदल होऊ शकतो, असेही मस्किन यांनी सांगितले. या वेळी संस्थेचे संचालक प्रा. राजस परचुरे उपस्थित होते. मस्किन यांच्या हस्ते१५८ विद्यार्थ्यांना पदव्युत्तर पदवी, पीएचडी प्रमाणपत्र प्रदान केले.