Baramati News : बारामतीत साकारणार 564 कोटींचे पशुवैदयकीय महाविद्यालय; परळीलाही दिली मान्यता

बारामती - शैक्षणिक हब म्हणून नावारुपास आलेल्या बारामतीत आता आणखी एका वेगळया विद्याशाखेची भर पडणार आहे. मेडीकल, आयुर्वेदीक पाठोपाठ आता नवीन पशुवैदयकीय महाविद्यालय स्थापन करण्यास राज्य मंत्रीमंडळाने मंगळवारी (ता. 25) मंजूरी दिली. उपमुख्यमंत्री अजित पवार यांच्या गेल्या महिन्याभरातील सातत्यपूर्ण पाठपुराव्याला या निमित्ताने यश मिळाले.

बारामतीत कृषिकच्या उदघाटनप्रसंगी पशुसंवर्धन मंत्री पंकजा मुंडे यांनी बारामतीत पशुवैदयकीय महाविद्यालय सुरु करण्याचा उपमुख्यमंत्री अजित पवार यांचा मानस आहे, त्यांनी तसा प्रस्ताव आणल्यास त्यास मंजूरी दिली जाईल, असे नमूद केले होते. त्या नुसार बारामती व परळी येथे पशुवैदयकीय महाविद्यालय स्थापन करण्यास मंत्रीमंडळाने मान्यता दिली. या महाविद्यालयांसाठी प्रत्येकी 564 कोटी 58 लाख रुपयांच्या खर्चास देखील मान्यता देण्यात आली आहे.

पंकजा मुंडे यांनी या बाबत ग्वाही दिल्यानंतर अजित पवार यांच्या कार्यालयाने या बाबत सातत्याने पाठपुरावा केल्यामुळे या प्रस्तावास मंजूरी मिळाली. या महाविद्यालयाच्या निमित्ताने बारामतीत पशुवैदयकीय शिक्षणाचे दालन देखील नव्याने खुले होणार असून ग्रामीण भागासाठी हे महाविद्यालय वरदान ठरणार आहे.

याबाबत बारामतीत दोन तीन जागांची पाहणी करण्यात आली असून उपमुख्यमंत्री अजित पवार हेच अंतिम जागा निश्चित करणार आहेत. या महाविद्यालयासाठी क-हावागज व माळेगाव बुद्रुक येथील 50 एकर जागा प्रस्तावित करण्यात आली आहे, अद्याप याला अंतिम मंजूरी मिळालेली नाही. या भूसंपादनासाठी किमान तीस कोटी रुपयांची तरतूद शासन करणार आहे.

नगर जिल्ह्यातील मौजे सावळी विहीर खुर्द शिर्डी, ता. राहाता येथील मंजूर पशुवैदयकीय महावद्यालय प्रकल्पाच्या धर्तीवर याचा प्राथमिक आराखडा निश्चित करण्यात आला आहे.

असे असेल महाविद्यालय......

या महाविद्यालयामध्ये मुले व मुलींचे वसतिगृह, ऑडीटोरियम, लेक्चर थिएटर कॉम्प्लेक्स, ग्रंथालय व संगणकीकरण केंद्र, इनडोअर स्पोर्ट्स कॉम्प्लेक्स, समाईक सुविधा केंद्र, विश्रामगृह, अधिष्ठाता निवास, अधिकारी व कर्मचारी निवासस्थाने, फार्मर वसतिगृह, फार्म शेड, क्रीडांगण, संरक्षक भिंत, फर्निचर या साठीची तरतूद करण्यात आली आहे.