बारामतीकरांनी अनुभवला महाबळेश्वरचा फील....

बारामती : अगदी काही फूटांवरचेही दिसणार नाही इतके दाट धुके पडलेले दव हवेतील आर्द्रता आणि कुंद वातावरण आज सकाळी लवकर घराबाहेर पडलेल्या बारामतीकरांना आपण महाबळेश्वरमध्ये तर नाही ना असाच फील आला. दोन दिवसांच्या अवकाळी पावसानंतर हवेत कमालीचा गारठा आला आहे, आज हवा कोरडी असल्याने दाट धुक्याचा अनुभव बारामतीकरांनी घेतला.

काल मुसळधार पावसाने बारामतीकरांची दाणादाण उडवली होती, तालुक्यात अनेक ठिकाणी गारठा व पावसाने शेळ्या मेंढ्या दगावल्याने शेतक-यांचे नुकसान झाले आहे. हिवाळा सुरु झाल्याची चाहूल लागत असतानाच अवकाळी पावसाने हजेरी लावल्याने हवेतील गारठा कमालीचा वाढला. काल आणि आज सकाळीही बोचरी थंडी बारामतीकरांनी अनुभवली.

आज सकाळी घराबाहेर पडल्यानंतर सुरवातीला हवेत धूर आहे की काय असा भास होत होता मात्र नंतर हे धुके असल्याचा अनुभव सर्वांनी घेतला. अगदी रस्त्यापर्यंत धुक्याचे लोट येऊन पोहोचल्याने अनेकांनी या धुक्याचा वेगळा अनुभव घेतला. बारामतीत सहसा इतके दाट धुके पडत नाही. उष्ण कटीबंधातील प्रदेश म्हणून बारामतीची ओळख असतानाच आता अवकाळी पाऊस, गारठा आणि बदललेले वातावरण याचा फटका पिकांनाही बसत आहे.

आज सकाळी दृश्यमानता अगदीच नगण्य असल्याने अगदी समोरचेही अंधुक दिसत असल्याने वाहनचालकांनाही सावकाश गाड्या चालवाव्या लागल्या. बारामती नगरपालिकेचे पथदिवे लवकर बंद होत असल्याने पहाटे फिरायला जाणा-या तसेच प्रवासानिमित्त बाहेर निघालेल्यांना अंधारातूनच मार्गक्रमण करावे लागते. पहाटे लवकर बंद होणारे आणि संध्याकाळी उशीरा सुरु होणा-या पथदिव्यांच्या टायमरमध्ये बदल करण्याबाबत नगरपालिकेस वारंवार आवाहन करुनही ऋतुनुसार बदल होत नसल्याची लोकांची तक्रार आहे.