बेल्हे येथे इंदिरानगरच्या प्राथमिक शाळेत आनंदी बाजार

बेल्हे, ता. ३ : बेल्हे (ता. जुन्नर) येथे शनिवारी (ता. ३) इंदिरानगरच्या जिल्हा परिषद प्राथमिक शाळेत आयोजित आनंदी बाजार व खाऊ गल्ली उपक्रमात लहानग्या विद्यार्थ्यांनी हसत खेळत आर्थिक व्यवहारांचा अनुभव घेतला. दरम्यान यावेळी लहानग्या विद्यार्थ्यांची ‘भाजी घ्या भाजी ... ताजी ताजी भाजी’ ही आरोळी लक्ष वेधून घेत होती. 
बेल्हे येथे इंदिरानगरच्या जिल्हा परिषद प्राथमिक शाळेत, विद्यार्थ्यांना आर्थिक व्यवहारांची ओळख व्हावी या उद्देशाने ‘आनंदी बाजार व खाऊगल्ली’ महोत्सवाचे आयोजन केले होते.
याप्रसंगी उपसरपंच राजेंद्र पिंगट, जानकू डावखर, डी. बी. वाळुंज, तुषार डावखर, नारायण पवार, दादाभाऊ मुलमुले, अल्पेश सोनवणे, गणेश पिंगट, किसन देशमुख, स्वप्नील खोल्लम, नंदा खोमणे आदींची उपस्थिती होती. यावेळी लहानग्या विद्यार्थ्यांनी भाजीपाला, फळे, विविध खाऊचे पदार्थ आदी विविध साहित्य विक्रीसाठी ठेवले होते. या उपक्रमास विद्यार्थ्यांच्या पालकांबरोबरच ग्रामस्थांचीही चांगला प्रतिसाद मिळाल्याचे शाळेचे मुख्याध्यापक अनिल कुटे यांनी सांगितले. या उपक्रमाचा अंगणवाडीच्या लहानग्या बालकांनीही आनंद घेतला. दरम्यान या कार्यक्रमाचे नियोजन शाळा व्यवस्थापन समिती तसेच इंदिरानगर शाळेचे मुख्याध्यापक अनिल कुटे, सहशिक्षिका सुरेखा कुटे यांनी यशस्वीपणे केले होते.