Pune Traffic : लाडक्या बहिणी आणि भाऊ अडकले वाहतूक कोंडीत

पुणे - भावंडांच्या स्नेहबंधनाचा सण असलेल्या रक्षाबंधनानिमित्त शहरातील नागरिक मोठ्या प्रमाणावर बाहेर पडल्याने पुण्यात येण्या-जाण्यासाठीच्या सर्व प्रमुख मार्गांवर आज सकाळपासूनच मोठ्या प्रमाणात वाहतूक कोंडीची समस्या निर्माण झाली आहे. यासह शहरातील मध्यभागात आणि उपनगरांत देखील मोठी कोंडी झाली आहे..पुणे-नाशिक महामार्गावरील चाकण परिसरात वाहनांच्या लांबलचक रांगा लागल्या आहेत. त्याचप्रमाणे वाकड, औंध, बाणेर, हिंजवडी, हडपसर आणि कात्रज परिसरातही वाहतूक संथ गतीने सुरू आहे.सकाळी सणासाठी गावाकडे जाणाऱ्यांची गर्दी आणि दुपारनंतर शहरात परतणाऱ्या वाहनचालकांचा ओघ वाढला आहे. त्यात दुपारी शहरात काही ठिकाणी पावसाने हजेरी लावली. त्यामुळे देखील वाहतुकीचा वेग मंदावला आहे. शहरातील अंतर्गत रस्त्यांवर कोंडी झाली असून, स्वारगेट, शिवाजीनगर, कोथरूड, पुणे स्टेशन परिसर, लक्ष्मी रोड, शनिवार पेठ अशा ठिकाणी वाहनांच्या रांगा लागल्या आहेत..बाजारपेठेत खरेदीसाठी आलेल्या नागरिकांमुळे पादचारी व वाहन वाहतुकीत गोंधळाचे वातावरण निर्माण झाले आहे. वाहतूक पोलिसांनी अतिरिक्त पथके तैनात करून कोंडी सोडवण्याचा प्रयत्न सुरू केला आहे. तसेच, काही ठिकाणी वाहने पर्यायी मार्गावर वळविण्यात येत आहेत. मात्र वाहनांच्या वाढत्या संख्येमुळे आणि सिग्नलवर होणाऱ्या उशीरामुळे नागरिकांची गैरसोय वाढली आहे..औद्योगिक वाहतूक आणि सणासुदीची गर्दी -पुणे-नाशिक महामार्गावर मालवाहतूक वाहनांची व खासगी गाड्यांची संख्या लक्षणीयरित्या वाढल्याने चाकण, आळंदी फाटा, मोशी, भोसरी या परिसरात कोंडी झाली आहे. औद्योगिक वाहतूक आणि सणासुदीची गर्दी यांचा वाहतुकीवर एकत्रित ताण पडला आहे.मुंबईकडे जाणाऱ्या हिंजवडी आयटी पार्क परिसरात सणानिमित्त सुटीवर गेलेल्या कर्मचाऱ्यांमुळे मोठी गर्दी झाली आहे. हडपसर आणि कात्रज बोगदा परिसरातही सणासुदीच्या निमित्ताने गावाकडे जाणाऱ्या गाड्यांनी कोंडी निर्माण केली आहे. वाघोलीत देखील अशीच परिस्थिती आहे..उपनगरेदेखील जाम -आज सकाळपासूनच पुण्यात येणाऱ्या तसेच पुण्यातून बाहेर जाणाऱ्या सर्व प्रमुख मार्गांवर वाहनांच्या लांबलचक रांगा लागल्या असून, उपनगरांतून शहरात येणारे रस्तेही ठिकठिकाणी ठप्प झाले आहेत. सिंहगड रस्ता, कात्रज-कोंढवा रस्ता, कर्वे रस्ता, एनडीए रस्ता, अहिल्यानगर रस्ता, गणेशखिंड रस्ता, सोलापूर रस्ता असे रस्ते जाम झाले आहेत.पूर्व पुण्यात हडपसर, फुरसुंगी, हडपसर बायपास रस्ता, तसेच दक्षिणेकडे कात्रज बोगदा परिसरातही मोठ्या प्रमाणावर कोंडी झाली आहे. अनेक ठिकाणी प्रवाशांना दोन ते तीन किलोमीटरचा प्रवास पूर्ण करण्यास अर्धा तासापेक्षा जास्त वेळ लागत आहे..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.