शहरातील गर्दी कमी करण्यासाठी भोर नगरपालिका प्रशासनाने उचलली पावले; वाचा सविस्तर

भोर (पुणे) - शहरात कोरोनाच्या रुग्णांमध्ये झपाट्याने वाढ होत असल्यामुळे शहरातील गर्दी कमी करण्यासाठी नगरपालिका प्रशासनाने पावले उचलली आहेत. शहरातील सर्व रस्ते बॅरीकेट लावून बंद करण्यात आले असून केवळ थोडे मर्यादितच मार्ग खुले ठेवण्यात आले आहेत. या दोन मार्गांवर तपासणीसाठी पोलिस व होमगार्डचे जवान बंदोबस्तासाठी कार्यरत राहणार आहेत.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

अती महत्वाच्या कामाशिवाय कोणालाही शहरात प्रवेश देण्यात येणार नाही. गर्दी टाळण्यासाठी शहरातील व्यापारी, व्यावसायीक व बॅंकांना प्रशासनाच्या वतीने योग्य त्या सूचना देण्यात आल्या आहेत. शहरातील प्रमुख मंगळवार पेठ, राजवाडा चौक मार्ग, नवी आळी मार्ग व शिवाजी पुतळा मार्ग या मार्गांवर रहदारीचे व गर्दीचे प्रमाण अधिक असते. त्यामुळे या मार्गांवर चारचाकी व मोठ्या वाहनांना येण्यास मज्जाव करण्यात येणार आहे.

नागरिकांनी सकाळी 9 ते दुपारी 2 या वेळेत गर्दी न करता सोशल डिस्टंसींगच्या नियमांचे पालन करून खरेदी-विक्री करावी आणि कोरोनाला प्रतिबंध करण्यासाठी सहकार्य करावे असे आवाहन नगरपालिका प्रशासनाकडून करण्यात आले आहे. शहरातील गर्दी टाळण्यासाठी नगरपालिका प्रशासनाने ही उपाययोजना केली असून पुढील दोन दिवसांमध्ये शहरातील गर्दी आटोक्यात न आल्यास पुन्हा लॉकडाऊन केले जाणार असल्याचे मुख्याधिकारी विजयकुमार थोरात यांनी सांगितले. जिवनापेक्षा कोणतेही काम महत्वाचे नाही, नागरिकांनी कामापेक्षा आपल्या जगण्याकडे लक्ष देवून गर्दीत जाणे टाळावे, आणि प्रशासनाला कारवाई करण्यास भाग पाडू नये. असे आवाहन पोलिस निरीक्षक राजू मोरे यांनी केले आहे.

Edited By - Prashant Patil