भोसरीकरांनी अनुभवला थरार

भोसरी, ता. २३ : आंतरराष्ट्रीय सायकल स्पर्धकांचे टेल्को रस्त्यावरील इंद्रायणी कॉर्नरला दुपारी दोन वाजून वीस मिनिटांनी आगमन होताच नागरिकांनी जल्लोष करत स्पर्धकांना शुभेच्छा दिल्या.
स्पर्धेचा थरार अनुभवण्यासाठी नागरिकांनी दुपारी एकपासूनच टेल्को रस्ता, इंद्रायणी स्वीट कॉर्नर, स्वामी समर्थ शाळा, साई चौक, श्री तिरुपती बालाजी चौक, यश गार्डन, सबडिस्ट्रिक सर्कल, संतनगर चौक आदी भागांत गर्दी केली होती. सायकल स्पर्धक जवळ येताच जल्लोष करत शुभेच्छांसह सायकलपट्टूंचे मनोधैर्य वाढविले. अवघ्या काही सेकंदांत वाऱ्याच्या वेगाने डोळ्यांसमोरून पुढे जात असलेल्या सायकल शर्यतीचा थरार नागरिकांनी अनुभवला. दरम्यान, स्पर्धेच्या पहिल्या दिवसापासून चर्चेत असलेले सत्तर वर्षीय हौशी सायकलप्रेमी भाऊ जौंजाळे ऊर्फ नेटकऱ्यांचे ‘आप्पा’ हेदेखील भोसरी परिसरात सायकलपटूंच्या स्वागतासाठी उपस्थित होते. नागरिकांनी त्यांचे उत्साहात स्वागत केले.