Meri Mati Mera Desh : ‘मेरी माटी मेरा देश’ अभियानाला महाराष्ट्रात मोठा प्रतिसाद

पुणे - भारतीय जनता पक्षाच्या ‘मेरी माटी मेरा देश’ या महाअभियानाला राज्यभर मोठा प्रतिसाद मिळत असल्याची माहिती अभियानाचे प्रदेश संयोजक राजेश पांडे यांनी गुरवारी पत्रकार परिषदेत दिली. राज्यातील ३२७ तालुक्यांतील सुमारे २८ हजार ग्रामपंचायतींमधील घराघरांतून २५ ऑक्टोबरपर्यंत माती गोळा करण्यात येणार असल्याचेही त्यांनी सांगितले.

या प्रसंगी भाजपचे प्रदेश सरचिटणीस मुरलीधर मोहोळ, शहर सरचिटणीस राजेश येनपुरे, अभियानाचे शहर संयोजक पुनीत जोशी यावेळी उपस्थित होते. पांडे म्हणाले, ‘स्वातंत्र्यासाठी बलिदान देणाऱ्या हुतात्म्यांना स्वातंत्र्याच्या अमृत महोत्सवानिमित्त अभिवादन करण्यासाठी पंतप्रधान नरेंद्र मोदी यांनी ‘मन की बात’ कार्यक्रमातून ‘मेरी माटी मेरा देश’ अभियान राबविण्याचे आवाहन केले आहे.

१५ सप्टेंबरपर्यंत बूथ स्तरावर प्रत्येक घरातून माती किंवा धान्य गोळा करण्यात येणार आहे. त्या व्यक्तीचा माती किंवा धान्य घेतानाचा सेल्फी https://selfiewithmerimaati.in/photoupload/ या लिंकवर अपलोड करण्याचे आवाहन करण्यात आले आहे.’

पांडे पुढे म्हणाले, ‘'अभियानाच्या दुसऱ्या टप्प्यात प्रत्येक प्रभागात किंवा गाव पातळीवर ७५ रोपे लावून अमृतवाटीका तयार केली जाणार आहे. परिसरातील शाळा किंवा महाविद्यालयात शिलालेख लावले जातील. तालुका स्तरावर एनसीसी, एनएसएस, स्काऊट गाइड यांच्या सहभागातून सांस्कृतिक कार्यक्रम होतील.

तालुका स्तरावरील कलश २९ ऑक्टोबर पूर्वी राज्य मुख्यालयात पाठविले जातील. दिल्ली येथे ३१ ऑक्टोबरला अमृत कलशांतील माती शहीद वीरांच्या स्मरणार्थ कर्तव्य पथावर बांधलेल्या अमृत वाटिकेला अर्पण केली जाणार आहे.’

भाजपचे रविवारी हर घर जनसंपर्क

शहरातील भाजपचे बूथ स्तरावरील पाच हजार कार्यकर्ते येत्या रविवारी (ता. १०) माती किंवा धान्य अमृत कलशात संकलन करण्याच्या निमित्ताने हर घर जनसंपर्क अभियान राबविणार आहे, अशी माहिती अभियानाचे शहर संयोजक पुनीत जोशी यांनी दिली.

जोशी म्हणाले, ‘या निमित्ताने सैनिक, स्वातंत्र्य सैनिक आणि शहीद झालेल्या सैनिकांच्या कुटुंबीयांची भेट घेतली जाणार आहे. संध्याकाळी चार ते सहा या वेळेत मंडल स्तरावर अमृत कलशांचे संकलन केले जाणार आहे. त्या ठिकाणी शपथ घेऊन अमृतकलश यात्रा काढली जाणार आहे.’