Kasaba Peth Bypoll Election : कसबा पोटनिवडणुकीसाठी भाजपचा उमेदवार ठरला? 'हे' नाव आघाडीवर

पुण्यात विधानसभेच्या दोन जागेसाठी पोटनिवडणूक होणार आहे. त्यामुळे राजकीय पक्ष सतर्क झाले असनू निवडणुकीसाठी तयारी सुरु केली आहे. पुण्याच्या माजी महापौर आणि भाजपच्या आमदार मुक्ता टिळक आणि चिंचवडचे आमदार लक्ष्मण जगताप यांच्या निधनानंतर रिक्त झालेल्या जागेसाठी ही पोट निवडणूक होणार आहे. (Kasba Peth Bypoll Election)

दरम्यान कसबा पेठ पोटनिवडणूक काँग्रेस लढणार असल्याची माहिती समोर आली आहे. काँग्रेसने आपली अधिकृत भुमिका जाहीर केली आहे. त्यानंतर राष्ट्रवादी काँग्रेस, शिवसेना, मनसे हे देखीप पक्ष इच्छुक आहेत. ही निवडणूक लढविण्याची तयारी महाविकास आघाडीकडूनही दर्शविली आहे. त्यानंतर भाजपकडून ही पोटनिवडणूक बिनविरोध व्हावी यासाठी हालचाली सुरु केल्या आहेत. आता पुणे शहर भाजपकडून मोठं पाऊल उचलण्यात आलं आहे.

भाजपकडून कसबा पोटनिवडणुकीसाठी शैलेश टिळक यांच्या नाव आघाडीवर आहे. शैलेश टिळक हे भाजप आमदार मुक्ता टिळक यांचे पती आहेत. शैलेश टिळक यांनी काल चंद्रशेखर बावनकुळे यांची भेट घेतली आहे. काल दुपारी शैलेश टिळक यांनी भाजपचे प्रदेशाध्यक्ष चंद्रशेखर बावनकुळे यांची मुंबईत भेट घेतली आहे. तर भाजप उद्या किंवा परवा अधिकृत उमेदवार घोषणा करण्याची शक्यता आहे.

तर पुण्यात कसबा आणि चिंचवड विधानसभा मतदार संघाच्या पोटनिवडणुकीच्या तयारीला वेग आला आहे. पोटनिवडणूक बिनविरोध व्हावी, यासाठी भाजपकडून तयारी सुरु केलीय. कसबा मतदारसंघाची निवडणूक बिनविरोध करावी, असं आवाहन भाजपने सर्वपक्षीयांना केलं आहे. तर कसब्याच्या आमदार मुक्ता टिळक यांच्या निधनानंतर रिक्त जागेवर पोटनिवडणूक पार पडणार आहे. हीच पोटनिवडणूक बिनविरोध व्हावी, अशी विनंती भाजपचे शहराध्यक्ष जगदीश मुळीक यांनी सर्वपक्षीय नेत्यांना पत्राद्वारे केली आहे.