सवंगड्यांनी जपले रक्ताचे नाते

बेल्हे, ता. ५ : गेल्या दीड-दोन वर्षांपूर्वी दिवंगत चैतन्य पिंगट या जिवलग मित्राचा अपघाती मृत्यू झाला होता. त्याच्या स्मृतींना उजाळा देण्यासाठी त्याच्या मित्र मंडळींनी एकत्र येऊन रक्तदान शिबिराचा उपक्रम राबवून गरजू रुग्णांसाठी १९३ बाटल्या रक्त संकलन केले.
बेल्हे (ता. जुन्नर) येथे चैतन्यच्या स्मृतींना उजाळा देत रक्तदानाच्या उपक्रमातून रक्ताचे नाते जपणाऱ्या मित्रांचे हे कार्य कौतुकास्पद ठरले आहे. येथील प्राथमिक आरोग्य केंद्रात चैतन्यच्या मित्र मंडळींनी, त्याच्या स्मृतींना उजाळा देण्यासाठी नारायणगावच्या पूना ब्लड बँकेच्या सहकार्याने रक्तदान शिबिराचे आयोजन केले होते. चैतन्यच्या आठवणी जिवंत राहाव्यात अशी त्याच्या मित्र मंडळींची तळमळ होती. त्याच्या वाढदिवसाच्या दिवशी (ता. ४ जानेवारीला) त्याच्या मित्र मंडळींनी एकत्र येत रक्तदान शिबिर आयोजित करून त्याला श्रद्धांजली वाहिली. यावेळी त्याची आई इंदुमती व वडील राजेंद्र यांचेही डोळे त्याच्या आठवणींनी पाणावले. यावेळी एकूण १९३ बाटल्या रक्त जमा झाल्याचे पूना ब्लड बँकेचे संतोष साठे यांनी सांगितले.