नदीच्या पाण्यासोबत वाहत आलेली गोष्ट पाहून नागरिकांना बसला धक्का  

मांडवगण फराटा (पुणे) : शिरूर तालुक्यातील मांडवगण फराटा येथे भीमा नदीच्या पात्रात अनोळखी महिलेचा मृतदेह आढळला आहे. भीमा नदीत पाण्याच्या प्रवाहासोबत तो वाहत आला असावा, असा अंदाज आहे.

पुण्याच्या इतर बातम्या वाचण्यासाठी येथे क्लिक करा

याबाबतचा खबरी जबाब मांडवगणचे पोलिस पाटील गंगाधर भाऊसाहेब फराटे यांनी दिला आहे. आज (ता. २) सकाळी ७.३० वाजता मांडवगण फराटा येथे भीमा नदीच्या पुलाच्या पूर्व बाजूला योगेश शिवाजी फराटे यांच्या शेताजवळ भीमा नदीच्या पात्राच्या कडेला एक अनोळखी अंदाजे ४० ते ४२ वयाच्या महिलेचे पूर्ण सडलेल्या अवस्थेतील मृतदेह मिळून आला आहे. या महिलेच्या  अंगावर लाल रंगाचा ब्लाऊज व त्यावर काळ्या रंगाची पट्टी असून, गुलाबी रंगाचा परकर आहे. त्याला निळ्या रंगाची नाडी आहे. गळ्यात काळ्या रंगाचे मण्याची पोत आहे. त्यामध्ये धातूच्या दोन वाट्या आहेत. तसेच, हातात हिरव्या मोरपंखी बांगड्या आहे. 

पुणे जिल्ह्यात कोरोनाची साखळी तुटेना

प्राथमिक आरोग्य केंद्राच्या वैद्यकीय अधिकारी डॉ. मंजुषा सातपुते-इसवे यांनी मृतदेहाची उत्तरीय तपासणी केली. त्यानंतर मृतदेहावर अंत्यसंस्कार करण्यात आले. या महिलेबाबत कोणाला काही माहिती असल्यास तत्काळ शिरुर पोलीस स्टेशन (०२१३८-२२२१३९) किंवा मांडवगण फराटा पोलिस दूरक्षेत्राशी (०२१३७-२६२१३३) संपर्क साधण्याचे आवाहन पोलिसांनी केले आहे. याबाबतचा पुढील तपास पोलिस निरीक्षक प्रवीण खानापुरे यांच्या मार्गदर्शनाखाली मांडवगण फराटा पोलिस चौकीचे पोलिस हवालदार श्रावण गुपचे, पोलिस कॉन्स्टेबल किरण ढुके, योगेश गुंड, अक्षय काळे हे करीत आहेत.