Pune : पूना हॉस्पिटलमध्ये पुन्हा बॉम्ब ठेवल्याची धमकी

पुणे : पूना हॉस्पिटलमध्ये पुन्हा शुक्रवारी (ता. २) बॉम्ब ठेवल्याचा दूरध्वनी आल्यानंतर परिसरात घबराट उडाली. काल गुरुवारी मध्यरात्रीही बॉम्ब ठेवल्याचा दूरध्वनी नियंत्रण कक्षात आला होता. आज पुन्हा दुसऱ्यांदा दूरध्वनी आल्यानंतर पोलिसांनी रुग्णालयाची कसून तपासणी केली. परंतु बॉम्बसदृश्य वस्तू आढळून आली नाही.

नवी पेठेतील पूना हॉस्पिटलमध्ये बॉम्ब ठेवल्याचा दूरध्वनी पोलिस नियंत्रण कक्षात शुक्रवारी दुपारी साडेबारा वाजण्याच्या सुमारास आला. त्यानंतर विश्रामबाग पोलिसांसह बाँम्ब शोधक व नाशक (बीडीडीएस) पथक तातडीने घटनास्थळी दाखल झाले. ‘बीडीडीएस’च्या पथकाकडून परिसराची तपासणी करण्यात आली. दोन तास रुग्णालयाचा संपूर्ण परिसर पिंजून काढला. परंतु कोणतीही संशयित वस्तू आढळून आली नाही. अज्ञात व्यक्तीने खोडसाळपणे दूरध्वनी केल्याची माहिती पोलिसांनी दिली. शुक्रवारी पुन्हा बॉम्ब ठेवल्याचा दूरध्वनी आल्यानंतर रुग्णालयातील कर्मचारी आणि रुग्णांमध्ये घबराट पसरली होती.

पुण्यासह मुंबईतही बॉम्बची धमकी

पोलिस नियंत्रण कक्षाला काल गुरुवारी ज्या क्रमांकावरून बॉम्ब ठेवल्याचा दूरध्वनी आला होता, त्याचा क्रमांकावरून पुन्हा शुक्रवारी दूरध्वनी आला आहे. त्याच क्रमांकावरून मुंबईतही काही ठिकाणी बॉम्ब ठेवल्याचे दूरध्वनी केल्याचे समोर आले आहे. नियंत्रण कक्षाला निनावी दूरध्वनी करणाऱ्या त्या व्यक्तीचा सायबर पोलिस शोध घेत आहेत, अशी माहिती सहायक पोलिस आयुक्त वसंत कुंवर यांनी दिली.