Pune News : बोपोडी चौकातून शिवाजीनगरकडे येणारा रस्ता एक सप्टेंबरपासून खुला

पुणे - जुन्या मुंबई- पुणे महामार्गावरील बोपोडी चौकातून शिवाजीनगरकडे येणारा रस्ता येत्या शुक्रवारपासून म्हणजे एक सप्टेंबरपासून खुला करण्यात येणार आहे. हा रस्ता दुचाकी, तीनचाकी आणि चारचाकी वाहनांसाठी सुरू होणार असल्याचे प्रशासनाकडून सांगण्यात आले. त्यामुळे नागरिकांना वाहतूक कोंडीपासून मोठा दिलासा मिळणार आहे.

बोपोडी ते संविधान चौकदरम्यान मेट्रोचे काम सुरू होते. तसेच, रस्त्याचे रुंदीकरण आणि काँक्रिटीकरणाच्या कामामुळे बोपोडी ते खडकी स्टेशनदरम्यान वाहतूक दोन वर्षांपासून बंद होती. या मार्गावरील शिवाजीनगरकडे जाणारी वाहतूक खडकी बाजारमार्गे वळविण्यात आली होती. त्यामुळे शिवाजीनगरकडे जाणाऱ्या वाहनांना आरे चौकात येऊन पुढे जावे लागत आहे.

या वाहतुकीमुळे बोपोडी, खडकी, औंध रस्ता ते पिंपरीपर्यंत वाहनांच्या लांब रांगा लागत आहेत. त्यामुळे वाहतूक कोंडी आणि खराब रस्त्यांमुळे नागरिकांना मन:स्ताप सहन करावा लागत आहे. मेट्रोचे काम पूर्ण झाल्यामुळे बोपोडी चौकातून शिवाजीनगरकडे येणारा रस्ता वाहतुकीसाठी खुला करावा, अशी मागणी विविध राजकीय पक्ष आणि संघटनांकडून प्रशासनाकडे करण्यात येत होती.

हा प्रश्न मार्गी लावण्यासाठी लोकप्रतिनिधी, महापालिका आणि वाहतूक शाखेकडून प्रयत्न सुरू होते. आमदार सिद्धार्थ शिरोळे, महापालिकेचे अतिरिक्त आयुक्त विकास ढाकणे आणि पोलिस उपायुक्त विजयकुमार मगर यांच्या समन्वयातून बैठका घेण्यात आल्या.

मागील आठवड्यात संयुक्त पाहणी करून बोपोडी चौकातून शिवाजीनगरकडे येणारा रस्ता सुरू करण्याचे नियोजन करण्यात आले. त्यानुसार हा रस्ता खुला करण्याचा निर्णय घेण्यात आल्याची माहिती प्रशासनाकडून देण्यात आली.

उर्वरित रुंदीकरणासाठी आणखी कालावधी

या रस्त्यावरील अतिक्रमणे मोठ्या प्रमाणावर हटविली आहेत. हा रस्ता खुला करण्यात येत असला तरी रुंदीकरण आणि काँक्रिटीकरणाचे उर्वरित काम पूर्ण होण्यास आणखी दोन-तीन महिन्यांचा कालावधी लागेल. हा रस्ता आठपदरी झाल्यानंतर सर्व प्रकारची वाहतूक दुहेरी सुरू करण्यात येणार असल्याची माहिती प्रशासनाकडून देण्यात आली.