पुणे : वाढदिवशीच "त्यांनी' जग सोडले... वयाच्या अवघ्या 32व्या वर्षी या जगाचा निरोप घेताना त्यांनी चार जणांना जीवनदान दिले... मानवी संवेदना गोठवणारी ही घटना पुण्यातील केईएम रुग्णालयात शुक्रवारी सकाळी घडली.
पुरंदर तालुक्‍यातील नीरा गावातील वेल्डिंगचे वर्कशॉप असलेल्या 32 वर्षीय मुलाला "ब्रेन स्ट्रोक' झाला होता. त्याला उपचारासाठी रुग्णालयात दाखल केले होते. त्याच्या उपचार सुरू होते. पण, त्याचे शरीर त्या उपचारांना प्रतिसाद देत नव्हते. त्यांच्या मेंदूचे कार्य थांबल्याचे डॉक्‍टरांनी गुरुवारी अखेर रुग्णाच्या नातेवाइकांना सांगितले. कोणताही आजार नाही, कोणतीही व्याधी नाही... पण अचानक आलेल्या अर्धांगवायूच्या झटक्‍याने सर्व काही बदलले. 7 जून 1987 रोजी जगात आलेल्या या व्यक्तीने 7 जून 2019 रोजी जगाचा निरोप घेतला. पण, त्यापूर्वी त्याने हृदय, यकृत आणि दोन्ही मूत्रपिंड दान केली. त्यामुळे चार रुग्णांचे प्राण वाचविण्यात वैद्यकीय तज्ज्ञांना यश आले आहे.
पुण्यातील केईएम रुग्णालयात 32 वर्षांच्या "ब्रेन डेड' मुलाचे अवयव दान करण्यास नातेवाइकांनी परवानगी दिली. आज त्याचा वाढदिवस होता. केईएममधील रुग्णालाच यकृत प्रत्यारोपण करण्यात आले. एक मूत्रपिंड रूबी हॉल क्‍लिनिकला तर दुसरे ससून रुग्णालयातील रुग्णाशी तंतोतंत जुळले. त्यामुळे त्या रुग्णालयांकडे पाठविण्यात आले. या रुग्णाचे हृदय नागपूर येथे पाठविण्यात आले. डॉ. मनोज दुराईराज, डॉ. शंतनू शास्त्री या हृदय शल्यचिकीत्सकांच्या पथकाने दान हृदय काढून ते पुण्यातून 11 वाजताच्या विमानाने उड्डाण करून नागपूरला घेऊन गेले आहेत. सव्वा बारा वाजेपर्यंत हे विमान नागपूर विमानतळावर उतरेल. तेथून "ग्रीन कॉरिडॉर' करून हे हृदय प्रत्यारोपणासाठी रुग्णालयात घेऊन जाणार आहेत. त्यानंतर प्रत्यक्ष प्रत्यारोपणाची शस्त्रक्रिया सुरू होईल, अशी माहिती पुण्यातील "झोनल ट्रान्सप्लॅंट को-ऑर्डिनेशन कमिटी'च्या (झेडटीसीसी) समन्वयक आरती गोखले यांनी दिली.
पुण्याने ऑगस्ट 2015 रोजी महाराष्ट्रातील पहिले हृदय प्रत्यारोपण राज्याची राजधानी असलेल्या मुंबईत झाले. त्यावेळी पुण्यातील जहॉंगीर रुग्णालयातील महिलेने दान केलेले हृदय देण्यात आले होते. आता राज्याच्या उपराजधानीतील पहिले हृदय प्रत्यारोपणाही पुण्याने दान केलेल्या हृदयातून होत आहे, असेही त्यांनी सांगितले.
केईएम रुग्णालयातील प्रशासकीय अधिकारी विजय यादव म्हणाले, "मेंदूचे कार्य थांबलेल्या रुग्णाच्या नातेवाइकांनी अवयव दानास परवानगी दिली. पण, त्या रुग्णाचा आज वाढदिवस होता. त्याला एक सहा वर्षांचे बाळ असून, सध्या त्यांची पत्नी गर्भवती आहे.''
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.