Pune BJP : कसबा निवडणुकीत भाजपकडून आचारसहिंतेचा भंग

कसबा पेठ विधानसभेची पोटनिवडणुक जाहीर झाली आहे. त्या दिवसापासून पुणे आणि चिंचवडमध्ये आचारसंहिता जाहीर करण्यात आली आहे. असे असताना आचारसंहितेच्या काळात भारतीय जनता पार्टीकडून जाणीवपूर्वक कसबा मतदारसंघात भाजपाचे चिन्ह असलेले झेंडे दिसून आले आहेत.

दरम्यान प्रशासनाने यावर अजूनपर्यंत आचारसंहिता भंगाचा गुन्हा दाखल करण्यात आलेला नाही. प्रशासन जाणिवपूर्वक दुर्लक्ष करतंय का असा प्रश्न उपस्थित होतो आहे. कसबा मतदारसंघा आचारसंहिता जाहिर झालेली असताना पक्षाचे झेंडे झळकत आहेत. आचार संहिता सुरू असताना झेंडे लावले असताना कोणतीही कारवाई किंवा गुन्हा दाखल न झाल्यामुळे राजकीय वर्तुळात चर्चेला उधाण आले आहे.

राज्यातील रिक्त झालेल्या विधानसभेच्या दोन जागांसाठी पोटनिवडणूक जाहीर झाली आहे पुण्याच्या माजी महापौर आणि भाजपच्या आमदार मुक्ता टिळक आणि चिंचवडचे आमदार लक्ष्मण जगताप यांच्या निधनानंतर रिक्त झालेल्या जागेसाठी ही पोट निवडणूक होणार आहे.

पुणे कसबा पेठ आणि चिंचवड विधानसभेच्या दोन जागांसाठी सर्व पक्षांनी कंबर कसली असून सर्व पक्ष आपले उमेदवार उभे करण्यासाठी प्रयत्न करत आहेत. यासाठी बैठका, गाठीभेटी वाढल्या असून या पोटनिवडणुका चुरशीच्या होणार असल्याचं दिसून येत आहे.