'काका बस थांबवा ना' बसथांबे काढल्यामुळे बिबवेवाडीतील विध्यार्थ्यांचे हाल

बिबवेवाडी - 'काका बस थांबवा ना' दररोज रस्त्यावर थांबून बसवाल्या काकांना हाक द्यावी लागत आहे. परंतु, बस थांब्याचे ठिकाण निश्चित नसल्यामुळे विद्यार्थ्यांना रस्त्यावर कोठेही थांबावे लागत आहे.

स्वामी विवेकानंद मार्गावर प्रेम नगर सोसायटी ते अप्पर पर्यंत अडीच किलोमीटर अंतरावर दहा बस थांबे आहेत. परंतु, विवेकानंद मार्ग सिमेंट काँक्रीट चा करताना प्रेम नगर, इ एस आय हॉस्पिटल, बिबवेवाडी गावठाण, इंदिरा नगर, अप्पर कमान, अप्पर शेवटचा बस थांबा काढलेला आहे.

बिबवेवाडी गावठाण ते इंदिरा नगर बस थांब्यापर्यंत तीन बस थांबे असून महापालिकेच्या शाळांसह सहा शाळा आहेत. त्यामध्ये सुमारे वीस हजार विध्यार्थी शिक्षण घेतात. परंतु, अनेक विद्यार्थी सर्वसामान्य घरातील असल्यामुळे त्यांना बस शिवाय पर्याय नाही. त्यामुळे विध्यार्थी जुन्या बस थांब्याच्या जागेवर उभे राहतात. परंतु, बस थांबा नसल्याने बस चालक त्या ठिकाणी बस थांबवत नाही. त्यामुळे अनेक वेळा विद्यार्थ्यांना बस चालकाला आवाज देऊन बस थांबवावी लागते. त्यामुळे रस्त्यावर कोठेही बस थांबते. त्यातच विद्यार्थ्यांना दफ्तराचे ओझे पाठीवर घेऊन गर्दीत बस पकडावी लागत आहे, त्यामुळे मोठ्या अपघाताची शक्यता आहे.

रस्त्याची कामे करताना संबंधित बस थांबे काढल्यावर पुन्हा संबंधितानी पुन्हा बस थांबे लावणे गरजेचे आहे. परंतु, संबंधित ठेकेदाराच्या मनमानी कारभाराकडे अधिकाऱ्यांनी दुर्लक्ष केल्याने बस थांबे गायब झाल्याचा आरोप रोशन शिंदे यांनी केला आहे.

विशाल धनगर (विद्यार्थी, इयत्ता, सहावी) - गावठाण चौकातील बस थांब काढलेला असून येथे बस थांबत नाही, बस ड्रायव्हर काकांच्या मनात आले तर बस कोठेही थांबवतात.

दत्तात्रय झेंडे (पीएमपीएल, वाहतूक व्यवस्थापक) - शहरातील बस थांब्याबाबत निविदा काढण्यात आली होती परंतु प्रतिसाद मिळाला नाही, नव्याने निविदा काढून बस थांबे तयार करण्यात येतील.