औद्योगिक वसाहतीला प्रदूषणाचा विळखा

चाकण, ता. ३० : येथील औद्योगिक वसाहतीत प्रदूषणाचा प्रश्न दिवसेंदिवस गंभीर बनत चालला आहे. वाढते औद्योगिकीकरण, वाहनांची मोठी संख्या, धूळ मिश्रित हवा, रसायन युक्त हवा, सांडपाण्याचे तसेच ध्वनिप्रदूषण धोकादायक पातळीवर पोहोचले आहे. मात्र, याकडे राजकीय नेते, प्रशासन गांभीर्याने लक्ष देत नाहीत असेही चित्र आहे.
देशातील महत्त्वाच्या अशा चाकण औद्योगिक वसाहतीत वाहननिर्मिती, अभियांत्रिकी, रसायन, औषधनिर्मिती व इतर उद्योग, कंपन्या छोट्या, मोठ्या प्रमाणात आहेत. या कंपन्यांतून बाहेर पडणारा धूर, वायू तसेच धुळीमुळे हवेची गुणवत्ता मोठ्या प्रमाणात खालावली आहे. काही कंपन्या औद्योगिक वसाहतीच्या परिसरात रासायनिक कचरा पेटवून देतात. त्यामुळे सकाळी, संध्याकाळी परिसरात काळ्या धुराची दाट चादर पसरलेली असते. त्याचा परिणाम नागरिक, कामगारांच्या आरोग्यावर होत आहे. त्यामुळे परिसरातील नागरिकांना श्वसनविकार, दमा, खोकला, डोळ्यांचे विकार आदींचे प्रमाण वाढले आहे. तसेच, पाण्याच्या प्रदूषणाचाही प्रश्न तितकाच गंभीर झाला आहे. काही उद्योग, कंपन्यांकडून प्रक्रिया न केलेले सांडपाणी ओढे, नाले, इंद्रायणी, भीमा, भामा नदीत सोडले जात आहे. त्यामुळे नदीचे पाणी प्रदूषित झाले असून, त्यामुळे मासे व इतर जलचर मृत्युमुखी पडत आहेत. कूपनलिका, विहिरी यातील भूजल प्रदूषित झाले आहे. त्यामुळे ते पिण्यायोग्य राहिलेले नाही. स्थानिक नागरिकांना पिण्याच्या पाण्यासाठी टँकर व इतर पर्यायी साधनांवर अवलंबून राहावे लागत आहे. त्यामुळे पिण्याचे पाणी घेणे ही खर्चिक झाले आहे. प्रदूषित पाण्यामुळे त्वचारोग, पोटाचे आजाराचे रुग्ण वाढल्याचे आरोग्य विभागाचे म्हणणे आहे.

नियम मोडणाऱ्यांवर कारवाई करावी
प्रदूषण नियंत्रण मंडळाने नियमित औद्योगिक वसाहत परिसरात तपासण्या कराव्यात. नियम मोडणाऱ्या उद्योगांवर, कंपन्यांवर कारवाई करावी. तसेच औद्योगिक वसाहत परिसरात हरित पट्टा वाढवावा, अशी मागणी पर्यावरण प्रेमींकडून केली जात आहे.

औद्योगिक वसाहतीत कंपनीतील प्रदूषित सांडपाणी ओढ्यात सोडल्याने तीन महिन्यापूर्वी एका मेंढपाळाच्या १७ मेंढ्यांचा दुर्दैवी मृत्यू झाला होता. या प्रकरणी महाराष्ट्र प्रदूषण नियंत्रण मंडळाने कारवाई केली आहे. तसेच काही कंपन्यांकडून रासायनिक कचरा जाळला जात होता त्याचीही चौकशी केली आहे.
- नितीन गोरे, सदस्य, महाराष्ट्र प्रदूषण नियंत्रण मंडळ