ओमिक्रॉन धोका वाढलाय; नाताळ साधेपणाने साजरा करा - पुणे महापालिका

Pune News : कोरोनाची (Corona) साथ कमी झालेली असली तरी ओमिक्रॉन विषाणूनचा (Omicron Variant) धोका वाढला आहे. त्यामुळे नागरिकांनी नाताळ सण साधेपणाने साजरा करावा. चर्च व इतर ठिकाणी गर्दी करू नये असे आवाहन पुणे महापालिकेने (Pune Corporation) आदेशाद्वारे केले आहे.

नाताळसाठी चर्चमध्ये ५० टक्के उपस्थितीमध्ये नागरिकांना प्रार्थनेसाठी उपस्थित राहता येईल. तेथे गर्दी होऊ नये, सोशल डिस्टन्सींगच्या नियमांचे पालन व्हावे, मास्क वापरावा याकडे लक्ष द्यावे. सर्व परिसर निर्जंतूकिकरण केले जावे.

चर्चमध्ये प्रभू येशूंच्या जीवनावरील देखावे, ख्रिसमस ट्री यासह इतर काही सजावट केल्यास तेथे गर्दी होणार नाही यासाठी उपाययोजना करावी. चर्चबाहेर स्टॉल किंवा दुकान लावू नयेत. तसेच मिरवणुका काढण्यावर, फटाक्यांची आतषबाजी करण्यावर बंदी घालण्यात आली आहे, असे महापालिकेने काढलेल्या आदेशात नमूद केले आहे.