रांजणगाव गणपती येथे नवीन बसचे स्वागत

तळेगाव ढमढेरे (पुणे) : श्री क्षेत्र रांजणगाव गणपती (ता. शिरूर) येथे आजपासून सुरु झालेल्या पीएमपीएमएलच्या नवीन बसचे स्वागत ग्रामंस्थांनी केले. वाघोली ते रांजणगाव गणपती या मार्गावर पुणे महानगर परिवहन महामंडळाने बस सेवा सुरु केली असून, आज रांजणगाव ग्रामस्थांनी बस चालक व वाहक आणि प्रवाश्यांचा सत्कार केला. ३० मिनिटाला वाघोली ते रांजणगाव गणपती अशी बस सेवा सुरू झाली असून, दिवसातून १० फेऱ्या होणार आहेत. 

हे ही वाचा : विमाननगर येथे पदपथावरच अतिक्रमण 

यावेळी सरपंच सर्जेराव खेडकर, पंचायत समिती सदस्य विक्रम पाचुंदकर यांच्या हस्ते पुष्पहार अर्पण करून बसचे स्वागत करण्यात आले. बस सेवा सुरू झाल्यामुळे कामगार, विद्यार्थी व ग्रामस्थांनी समाधान व्यक्त केले आहे. अनेक वर्षांची बस सुरु करण्याची मागणी पूर्ण केल्याने आनंद व्यक्त करण्यात आला. श्री क्षेत्र रांजणगाव गणपती हे अष्टविनायक महागणपतीचे तीर्थक्षेत्र व पंचतारांकीत औद्योगिक वसाहत असल्याने नागरिक व कामगारांना ही बससेवा सोयीची झाली आहे.

हे ही वाचा : कोरोनावर आयुर्वेदाची मात्रा; पुण्यातील वैद्यकीय तज्ज्ञांचे नेचर ट्रायलमध्ये रिसर्च पेपर प्रसिद्ध

यावेळी उद्योजक राजेश लांडे, युवासेना जिल्हा प्रमुख बापूसाहेब शिंदे, रामदास लांडे, नामदेव पाचुंदकर व ग्रामस्थ उपस्थित होते