भाजप कार्यकर्त्यांकडून शहरभर जल्लोष!

पुणे, ता. ९ : नवी दिल्लीतील संसदेच्या प्रांगणात रविवारी (ता. ९) रात्री ठीक पावणेदहा वाजता खासदार मुरलीधर मोहोळ यांनी केंद्रीय मंत्रिमंडळात राज्यमंत्री पदाची शपथ घेतली आणि पुण्यात भाजपने एकच जल्लोष केला. फटाक्यांची आतषबाजी, बँडचे सुमधुर संगीत आणि त्या जोडीला गरमागरम जिलेबीने तोंड गोड करून ‘अण्णां’ना नव्या राजकीय कारकिर्दीच्या भरभरून शुभेच्छा दिल्या.
रविवारी सकाळी नऊ वाजता मोहोळ यांची केंद्रीय मंत्रिमंडळात वर्णी लागणार असल्याची वार्ता पुण्यात पसरली. त्यानंतर शहर भाजपने मोदी सरकारच्या शपथविधी सोहळ्याची आणि मोहोळ यांच्या मंत्रिमंडळातील समावेशाची जय्यत तयारी सुरू केली. भाजपचे शहराध्यक्ष धीरज घाटे यांनी शहराच्या वेगवेगळ्या भागात हा आनंदोत्सव साजरा करण्याच्या सूचना पक्षाच्या पदाधिकाऱ्यांना दिल्या. त्यानुसार सायंकाळपासून शहराच्या वेगवेगळ्या भागात भाजपने कार्यक्रम घेण्यास सुरुवात केली.
मोहोळ यांनी केंद्रीय राज्यमंत्री पदाची शपथ रात्री पावणेदहा वाजता घेतली आणि त्यानंतर फटाक्यांची जोरदार आतषबाजी करत कार्यकर्त्यांनी मोहोळ व भाजपच्या नावाचा जयघोष करत एकच जल्लोष केला. या वेळी भाजपतर्फे नागरिकांना या आनंदाच्या सोहळ्यानिमित्त खास जिलेबी वाटप करण्यात आली. या वेळी शहराध्यक्ष धीरज घाटे, माजी नगरसेवक सम्राट थोरात, अजय खेडेकर, बापू मानकर, मनीषा घाटे, दिलीप काळोखे, धनंजय जाधव यांच्यासह पक्षाचे कार्यकर्ते, पदाधिकारी मोठ्या संख्येने उपस्थित होते.

शपथविधी पाहण्यासाठी एलईडी स्क्रीन...
स. प. महाविद्यालय येथील चौकात भाजपतर्फे शपथविधी सोहळ्याचे थेट प्रक्षेपण करण्यासाठी एलईडी स्क्रीन लावण्यात आले होते. याबरोबरच बँड पथक ही ठेवण्यात आले होते.