पुणे : न्यायालयाच्या गेटजवळच मिळणार दाव्यांची माहिती; ई-सेवा केंद्राचे उद्‌घाटन

पुणे ः न्यायालयीन प्रशासनाकडून पुरविण्यात येणा-या ऑनलाइन सुविधांची माहिती घेणे आता पक्षकारांना अधिक सोईचे होणार आहे. आपल्या खटल्याची स्थिती काय आहे, पुढील तारीख कोणती आहे? अंतरिम आदेश अपलोड झाले का? या सारख्या अनेक बाबींची माहिती पक्षकारांना मिळावी म्हणून न्यायालयाच्या गेटजवळच ई-सेवा केंद्र सुरू करण्यात आले आहे.
प्रमुख जिल्हा व सत्र न्यायाधीश एन. पी. धोटे यांच्या हस्ते मंगळवारी या केंद्राचे उद्‌घाटन करण्यात आले. पुणे बार असोसिएशनचे अध्यक्ष ऍड. सतीश मुळीक यावेळी उपस्थित होते. पक्षकारांना माहिती देण्यासाठी या केंद्रामध्ये एक लिपिक, जिल्हा विधी सेवा प्राधिकरणाचा एक वकील व पॅरा लीगल व्हॉलेंटीअर असणार आहे.

हे ही वाचा : पुण्यातील चतुःश्रृंगी पोलिस ठाण्यात गुन्हा दाखल

न्यायालयीन व्यवस्थेमधील अनेक कामकाज सध्या ऑनलाइन देखील सुरू आहे. मात्र प्रत्येक पक्षकारांना ऑनलाइन सुविधा हाताळणे शक्‍य होत नाही. त्याबाबतची सुविधा त्यांच्याकडे नाही किंवा त्यांना ही सुविधा कशी वापरायची याची माहिती नसते. त्यामुळे त्यांची ही अडचण दूर करत पक्षकारांना अधिक चांगली सुविधा मिळण्यासाठी देशात सर्वच जिल्हा न्यायालयात अशा प्रकारच्या केंद्रांची स्थापना करण्यात येत आहे. सकाळी साडेदहा वाजता सुरू झालेले केंद्र न्यायालयीन कामकाजाच्या वेळेपर्यंत खुले राहणार आहे. येथील सुविधांचा पक्षकारांना लाभ घ्यावा, असे आवाहन जिल्हा न्यायालय प्रशासनाकडून करण्यात आले आहे.

ही माहिती मिळणार ः
- व्हिडिओ कॉन्फरन्सद्वारे सुनावणी कशी घेतली जाते
- आदेश, निकालाची सॉफ्ट कॉपी ई-मेल, व्हाट्‌सअपद्वारे देण्यात मदत
- दाव्याची स्थिती सध्या काय आहे
- सुनावणीची पुढील तारीख काय आहे
- कैद्यांच्या ई-मुलाखतीची प्रक्रिया

केंद्रातून काय करता येणार ः
- सर्टिफाईड कॉपीसाठी ऑनलाइन अर्ज
- ऑनलाइन दावे दाखल करण्यात साहाय्य
- ई-स्टॅम्प व ई-पेमेंटसाठी मदत
- डिजिटल सहीसाठी अर्ज
- "ई-कोर्ट' ऍप डाऊनलोड करण्यासाठी जागृती
- वाहतूक विभागाचे इ-चलनाचे दावे व्हर्च्युअल न्यायालयात निकाली काढण्यात मदत

हे ही वाचा : औषध फवारणीचा कृषी विभागाचा सल्ला

कुठे आहे हे केंद्र ः
जिल्हा न्यायालयातील गेटनंबर चारमधून आत आल्यानंतर जुन्या इमारतीच्या शेजारी

(संपादन : सागर डी. शेलार)