Narayangaon News : बैलगाडा शर्यतीच्या रामा बैलाच्या मालकी हक्कावरून दोन गटात हाणामारी; सहा जणांवर गुन्हा दाखल

नारायणगाव - पुणे जिल्ह्याच्या घाटातील बैलगाडा शर्यतीत अनेक बक्षीस मिळवलेल्या, हरणाप्रमाणे धावणाऱ्या, घाटाचा राजा म्हणून नावलौकिक मिळवलेल्या रामा बैलाच्या मालकी हक्कावरून दोन जिवलग मित्रांमध्ये निर्माण झालेला वाद बैलगाडा शौकिन व मालकांमध्ये चर्चेचा विषय झाला आहे..रामा बैलाच्या मालकी हक्कावरून दोन गटात कोयता, दगड व लाकूड आदि साहित्याचा वापर करून हाणामारीची घटना गुंजाळवाडी येथे झाली आहे. याप्रकरणी परस्पर दिलेल्या फिर्यादीवरून सहा जणांवर नारायणगाव पोलिसांनी गुन्हा दाखल केला आहे.गुंजाळवाडी (ता. जुन्नर) येथील बैलगाडा शौकीन असलेले नितीन शिंदे व राहुल ढवळे हे दोघे जिवलग मित्र आहेत. बैलगाडा शर्यतीचे बैल खरेदी- विक्रीचा त्यांचा व्यवसाय आहे. तीन वर्षांपूर्वी गुंजाळवाडी (ता. जुन्नर) येथील बैलगाडा मालक युवराज शिंदे व राहुल ढवळे यांनी औरंगाबाद येथून एक लाख रुपये किमतींला दोन वर्ष वयाचा बैल खरेदी केला..त्यानंतर युवराज शिंदे यांना दोन लाख पन्नास हजार रुपये देऊन हा बैल राहुल व नितीन यांनी भागीदारीत खरेदी केला. बैल खरेदी करताना राहुल याने दोन लाख रुपये तर नितीन याने पन्नास हजार रुपये असे अडीच लाख रुपये युवराज शिंदे यांना रोखीने दिले.देखभाल करण्यासाठी हा बैल नितीन शिंदे यांच्या ताब्यात ठेवण्यात आला. नितीन शिंदे व त्यांचे वडील भगवान शिंदे यांनी या बैलाला गावठी तूप, अंडी, कडधान्य, प्रोटीन पावडर असा खुराक देऊन बैलाला शर्यतीसाठी तयार केले. त्यासाठी त्यांनी प्रतिमहिना सुमारे वीस हजार रुपये खर्च केला..या बैलाने पुणे जिल्ह्यातील अनेक घाटात बक्षीसे मिळवली. या बैलाला त्यांनी रामा असे नाव ठेवले. बैलगाडा शौकिन व मालकांमध्ये रामा बैलाची ख्याती सर्व दूर पसरली. सद्यस्थितीत बैलगाडा मालकांकडून रामा बैलाला वीस लाख रुपयांची मागणी होत आहे.बैलगाडा शौकीन आशिष फुलसुंदर यांनी सात लाख रुपयांना बैल खरेदी करण्याची तयारी दाखवली होती. शर्यतीत रामाचा नावलौकिक वाढल्याने व किंमत वाढल्याने रामाच्या मालकी हक्कावरून नितीन व राहुल या दोन जिवलग मित्रांमध्ये वाद निर्माण झाला..बैल खरेदीसाठी मी पैसे दिले आहेत. या मुळे सध्याची किंमत ठरवून रामा बैल माझ्या ताब्यात मिळावा अशी मागणी राहुल याने केली. मात्र रामाचे पालन पोषण करून त्याला शर्यतीसाठी मी तयार केले आहे. असा दावा करून नितीन याने राहुल याला रामाला देण्यास नकार दिला.रामा बैल आजारी असल्यामुळे पाहण्यासाठी राहुल त्याच्या दोन मित्रांसमवेत गुंजाळवाडी येथील नितीन शिंदे यांच्या गोठ्यावर गेला. यावरून नितीन शिंदे व राहुल ढवळे यांच्यात वाद झाला. या वेळी राहुल ढवळे व त्याच्या दोन मित्रांनी कोयता व लाकडी दांडक्याने मारहाण केल्याची तक्रार नितीन शिंदे यांनी नारायणगाव पोलिस ठाण्यात दिली..तर नितीन शिंदे व त्याच्या कुटुंबातील इतर दोन सदस्यांनी लाथा बुक्क्यांनी व दगड डोक्यात टाकून जखमी केल्याची तक्रार राहुल ढवळे यांनी नारायणगाव पोलिस ठाण्यात दिली. जखमी राहुल ढवळे हे खाजगी रुग्णालयात उपचार घेत आहेत.परस्पर विरोधी तक्रारीवरून नारायणगाव पोलिसांनी सहा जणांवर गुन्हा दाखल केला आहे. मात्र रामा बैलाचा वाद अजून सुरूच आहे. याबाबत पोलिसांच्या भूमीकेडे बैलगाडा मालकांचे लक्ष लागले आहे..महादेव शेलार (सहाय्यक पोलिस निरीक्षक नारायणगाव) - बैलाची विक्री त्रयस्थाला करून आलेली रक्कम राहुल व नितीन यांनी विभागून घ्यावी व वाद मिटवावा असा सल्ला देण्यात आला आहे. वाद न मिटल्यास रामा बैल ताब्यात घेऊन पांजरपोळा येथे जमा केला जाईल..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.